Շաբաթ օրը Չինաստանի մայրաքաղաք Պեկինում մեկնարկել է «Մեկ գոտի՝ մեկ ճանապարհ» ռազմավարության շրջանակներում միջազգային համագործակցության հարցերով բարձր մակարդակի երկօրյա համաժողովը: Այս մասին հայտնում է RIA Novosti-ն:
Համաժողովում նախատեսվում է 29 պետությունների և կառավարությունների ղեկավարների՝ Արգենտինայի, Բելառուսի, Չիլիի, Չեխիայի, Ինդոնեզիայի, Ղազախստանի, Քենիայի, Լաոսի, Ֆիլիպինների, Ռուսաստանի, Շվեյցարիայի, Թուրքիայի, Ուզբեկստանի, Վիետնամի, Ղրղզըստանի նախագահների, Կամբոջայի, Եթովպիայի, Ֆիջիի, Հունաստանի, Հունգարիայի, Իտալիայի, Մալազիայի, Մոնղոլիայի, Պակիստանի, Լեհաստանի, Սերբիայի, Իսպանիայի, Շրի-Լանկայի վարչապետերի, Մյանմայի պետքարտուղարի մասնակցությունը:
Համաժողովին կմասնակցեն նաև ԱՄՆ-ի, Հարավային Կորեայի, Հյուսիսային Կորեայի, Գերմանիայի, Ֆրանսիայի, Մեծ Բրիտանիայի, Ճապոնիայի, ԵՄ ներկայացուցիչները, ՄԱԿ-ի գլխավոր քարտուղարը, Արժույթի միջազգային հիմնադրամի գործադիր տնօրենը, Համաշխարհային բանկի նախագահը: Համաժողովի հյուրերի և մասնակիցների ընդհանուր թիվը հասնում է մոտ 1 500-ի աշխարհի ավելի քան 130 երկրից:
Համաժողովի ծրագիրը բաժանված է 2 օրվա: Առաջին օրը կանցկացվի ընդհանուր լիագումար նիստ, 6 զուգահեռ թեմատիկ հանդիպում:
Երկրորդ օրը՝ մայիսի 15-ին տեղի կունենա կլոր սեղանի երկու փուլ: Կլոր սեղանների երկու փուլերի ընդմիջմանը տեղի կունենա մասնակիցների համատեղ լուսանկարվելու արարողություն և աշխատանքային ճաշ:
Համաժողովը կավարտվի Չինաստանի նախագահ Սի Ցզինպինի մամլո ասուլիսով, որի ընթացքում նա կամփոփի համագումարի արդյունքները:
