«Առաջին լրատվական»-ի զրուցակիցն է ՀՀԿ խմբակցության ազգությամբ քուրդ պատգամավոր Կնյազ Հասանովը։
– Պարոն Հասանով, ԱԺ առաջին նիստը որպես ամենատարեց պատգամավոր Դուք եք վարելու։ Պատրաստվե՞լ եք։
– Որ ասել են՝ երևի ճիշտ է, ուրեմն ես պետք է վարեմ Ազգային ժողովի վեցերորդ գումարման անդրանիկ նիստը՝ մինչև Ազգային ժողովի նախագահ ընտրվելը։
Առաջնահերթություն չկա՝ նախ այդ երևույթը լավն է, ինձ համար ուրախալի է, պատմական փաստ է։ Ինձ համար շատ լավ ու ընդունելի կլինի։ Թե չէ ՝ պարզ մեկը պետք է վարի, ավագներից ես եմ ցուցակի մեջ, և երևի ինձ կհանձնարարեն, որ վարեմ նիստը։
– Իսկ ելույթ պատրաստե՞լ եք։
– Բոլոր դեպքերում ես և ՀՀ բոլոր ազգային փոքրամասնությունները իրենց երախտիքի խոսքը կասեն ՀՀ իշխանություններին, հայ ժողովրդին։ Լավ է, որ ազգային փոքրամասնությունների 4 ներկայացուցիչ գտնվելու են Ազգային ժողովում։ Պատմական է, որ Ազգային ժողովի փոքրամասնության ներկայացուցիչը վարի առաջին նիստը, այսինքն՝ ես եմ վարելու: Սա խոսում է այն մասին, որ Հայաստանը ժողովրդավարական երկիր է։ Այսինքն՝ Ազգային ժողովի փոքրամասնությունները տեղ ունեն և բիզնեսում, և էդպես, և, վերջապես, Ազգային ժողովում։
– Ի՞նչ եք կարծում՝ Գալուստ Սահակյանից հետո մի փոքր դժվար չի լինի Ձեզ համար նիստ վարելը։
– Ես չգիտեմ։ Գալուստ Սահակյանն աշխատել է Ազգային ժողովի նախագահ, հիմա Ազգային ժողովը նոր նախագահ կընտրի՝ ես տեղյակ չեմ։ Բայց Գալուստ Սահակյանը շատ խելացի անձնավորություն է և շատ լավ համբավ է թողել որպես ԱԺ նախագահ։
– Պարոն Հասանով, օրերս տեղեկություն տարածվեց, թե քուրդ և եզդի համայնքների միջև լարվածություն կա. եզդիները դժգոհում են, որ իրենք քանի որ ավելի շատ են, պետք է դուք և իրենք հավասար քանակությամբ մանդատներ չունենայիք։ Կա՞ այդպիսի լարվածություն։
– Ոչ մի լարվածություն չկա։ Ես այդ հարցին չեմ էլ ուզում պատասխանել։ Սա մարդու իրավունքների պաշտպանություն է, ով կասի՝ ես եզդի եմ, թող եզդի մնա, ով կասի քուրդ է՝ թող քուրդ լինի։ Հայաստանի իշխանությունները բոլոր փոքրամասնություններին մի աչքով են նայում, մի ձևով են տեղ տալիս ու ամեն ինչ անում են, որ ազգային փոքրամասնություններն աճեն ու բարգավաճեն։
Լուսանկարը՝ armeniasputnik.am-ի
