Ռոջեր Ուոթերսը հերքել է Pink Floyd-ի վերադարձի մասին լուրերը: Երաժիշտը ասել է իր կարծիքը BBC Radio 4-ի եթերում հեռարձակվող Desert Island Discs հաղորդման ժամանակ:
Ուոթերսի խոսքերով՝ ինքը չի ցանկանում կրկին դառնալ խմբի անդամ: Միևնույն ժամանակ Ուոթերսը հայտարարել է, որ չի զղջում խմբում անցկացրած տարիների համար և բարձր է գնահատում իր գործընկերների հետ նվաճած արդյունքները:
Pink Floyd խմբի հնարավոր վերամիավորման մասին լուրերը տարածվեցին Ուոթերսի The Wall Live համերգաշարքից հետո: Մայիսի 12-ին Լոնդոնի O2 Arena համալիրում տեղի ունեցած համերգի ընթացքում նրան էին միացել խմբի կենդանի մնացած բոլոր անդամները: Ուոթերսն ու Գիլմորը համատեղ երգել են Comfortably Numb երգը: Բացի այդ, Outside the Wall երգի կատարմանը մասնակցել է նաև Նիք Մեյսոնը:
2010 թ. Ուոթերսն ու Գիլմորն արդեն միասին ելույթ են ունեցել: Նրանք երկուսն էլ մասնակցում էին HOPING (Hope and Optimism for Palestinians in the Next Generation) հիմնադրամի կողմից կազմակերպած բարեգործական ակցիային: Pink Floyd խմբի վերջին վերամիավորումը տեղի է ունեցել 2005 թ.: Այդ ժամանակ Ուոթերսի և Գիլմորի հետ հանդես են եկել Մեյսոնն ու Ռիչարդ Ռայթը, որը 2008 թ. մահացել է: