ԱՄՆ նախագահ Դոնալդ Թրամփի վարչակազմն առանձնահատուկ վերահսկողության տակ կվերցնի ռուսական նավահանգիստները Վլադիվոստոկում, Նախոդկայում և Վանինոյում՝ Հյուսիսային Կորեայի դեմ պատժամիջոցների կատարման համատեքստում։ Այս մասին փոխանցում է RIA Novosti-ն։
Համանման նորմ է պարունակվում օրինագծում, որն ընդունվել է երեկ ԱՄՆ Կոնգրեսի Ներկայացուցիչների պալատի կողմից։ Փաստաթղթում ասվում է, որ Թրամփն օրենքի՝ ուժի մեջ մտնելուց հետո 180 օրվա ընթացքում, իսկ այնուհետև իր նախագահական ժամկետի ընթացքում ամեն տարի Կոնգրես ներկայացնի հաշվետվություն նավահանգիստների ու օդանավակայանների վերաբերյալ, որոնք խախտում են Փխենյանի հանդեպ սահմանված ՄԱԿ ԱԽ բանաձևերը։
Նշվում է, որ ռուսական նավահանգիստներից բացի, փաստաթղթում հիշատակվում է նաև չինական և իրանական նավահանգիստների, ինչպես նաև սիրիական Տարտուս և Լաթաքիա նավահանգիստների մասին։
Այդ օրինագիծն ուղղված է ԱՄՆ նախագահի լիազորությունների ընդլայնմանը՝ ընդդեմ Հյուսիսային Կորեայի ՄԱԿ ԱԽ որոշ բանաձևերը խախտող անձանց նկատմամբ պատժամիջոցներ սահմանելու հարցում։
