«Առաջին լրատվական»-ի զրուցակիցն է ազատամարտիկ, «Ծառուկյան» դաշինքի պատգամավորության նախկին թեկնածու Մուշեղ Սաղաթելյանը։
– Պարոն Սաղաթելյան, հրապարակվեց «Ծառուկյան» դաշինքի՝ ինքնաբացարկի դիմում հայտնած թեկնածուների ցանկը, Դուք ևս այդ ցանկում եք։ Տեղյա՞կ եք։
– Այդ թեմայով ինձ հետ խոսակցություն չի եղել։ Բայց շտաբում բազմաթիվ անձնական թղթեր եմ ներկայացրել՝ ոստիկանությունից և այլն։ Ընդունողը Մուրադյան Ալբերտն էր՝ իր մոտ է եղել, բայց ինքնաբացարկի մասին խոսք չի եղել։ «Ծառուկյան» դաշինքի շտաբում մի աղջիկ կար նստած՝ քարտուղարությունում, այդ աղջկան լիազորագիր տրվեց թեկնածուի, այդտեղ եմ ստորագրել։ Բայց ուրիշ տեսակի խոսակցություն չի եղել, ինքնաբացարկի մասին խոսակցություն ինձ հետ չի եղել։ Չգիտեմ՝ ինչ մատյանի մեջ եմ ստորագրել, ինչ կարգով է եղել, թող իրենք ասեն, թե այդ ողբերգական արարողությունը ոնց է եղել։
– Այսինքն՝ ինչպես հասկացա, Ձեզ ուրիշ թղթեր են տվել ստորագրելու, և հիմա պարզվում է՝ դա ինքնաբացարկի դիմում է եղել։
– Ես օրենքով պահանջված թղթեր եմ ներկայացրել, երկու անգամ ինձ շտաբ են կանչել, թուղթ են տվել՝ ստորագրել եմ, որ անձնական գործ են կազմում, բայց ինքնաբացարկի մասին խոսակցություն ընդհանրապես չի եղել:
– Այսինքն՝ Ձեզ ասել են՝ անձնական գործի դիմում է։
– Ես երեկ նոր իմացել եմ, որ ինքնաբացարկի դիմում է եղել իմ անունից։ Մնացածը իրենք գիտեն։
– Իսկ Դուք ինչ-որ քայլեր ձեռնարկելո՞ւ եք։ Օրինակ՝ Նապոլեոն Ազիզյանը գնում է ԿԸՀ՝ իր մանդատը ստանալու։
– Ես հիմա Գյումրիում եմ, չեմ հասցնի մինչև 15.00-ը գամ Երևան։ Բացի դրանից՝ եթե ես ինքնաբացարկի դիմում չեմ գրել, ապա ինչո՞ւ գրեմ՝ խնդրում եմ ինքնաբացարկիս դիմումը հետ ընդունեք։ Եթե ես դա չեմ արել, ինչո՞ւ գրեմ։ Դրանով ապացուցեմ, որ արել եմ, ու իրենք էլ ինչ-ինչ որոշումնե՞ր կայացնեն։
– Այս երևույթն ինչպե՞ս կմեկնաբանեք։
– Սա հիմա հիվանդություն է, բոլորի մոտ էլ կա։ Գողական օրենք է՝ նախօրոք ստորագրություն են վերցնում ու ժամանակին օգտագործում։ Եթե նոտարով է, իմ կարծիքով՝ անձը պետք է պարտադիր ներկա լիներ, որ նոտարական գործողություն արվեր։
– Հովիկ Աբրահամյանի նոտար դուստրն է արել, երևի Ձեր ներկայությունը չի պահանջվել։
– Չգիտեմ։ Դա իրենց խնդիրն է արդեն։
