Այսօր «Ազատագրենք հուշարձանն օլիգարխից» շարժման նախաձեռնող խումբը նամակ ուղարկեց Երևանի քաղաքապետ Տարոն Մարգարյանին, ՀՀ մշակույթի նախարար Հասմիկ Պողոսյանին, ՀՀ անշարժ գույքի կադաստրի պետ Երվանդ Զախարյանին, ՀՀ գլխավոր դատախազ Աղվան Հովսեփյանին և ՀՀ ոստիկանության պետ Վլադիմիր Գասպարյանին՝ պարզելու, թե ինչ են արել վերոնշյալ կառույցները՝ կանխելու համար Փակ շուկայի ճարտարապետական աղավաղումները: Նրանք պահանջում են այս ուղղությամբ կատարված աշխատանքների հրապարակային հաշվետվություն:
«Առաջին լրատվական»-ի հետ զրույցում նախաձեռնող խմբի անդամ, դիրիժոր Վարդան Հակոբյանը նշեց, որ պետք է վերոնշյալ մարմինները հաշվետվություն տան, թե ինչ են արել այսքան ժամանակ ապօրինի շինարարությունը, շուկայի աղավաղումը կանխարգելելու համար, քանի որ բազմիցս ահազանգեր են եղել:
«Քանի դեռ չի հայտարարվել, որ մեր հանրապետությունը հանրապետություն չէ, մենք հույս ունենք՝ հանրապետության գործող օրենքների շրջանակում խնդիրը լուծում կստանա, երբ կհայտարարվի, որ մենք այլևս հանրապետություն չենք, այլ խանություն ենք, այն ժամանակ այլ քայլերի մասին կմտածենք, որոնց միջոցով հնարավոր է՝ շուկան կվերադարձնենք նախկին տեսքին»,- ասաց նա:
Հարցին՝ երբ շուկան ամբողջովին քանդվում էր, ներսում չկային տարրական պայմաններ և վխտում էին առնետները, ինչո՞ւ չբարձրաձայնեցին խնդիրը, և նման նախաձեռնություն չստեղծվեց, Վարդան Հակոբյանը ասաց, որ բազմիցս բոլոր մակարդակներում ասվել է, որ շուկան մնալու է իր նախկին տեսքով, և վստահ էին, որ չի աղավաղվի հուշարձանը, բայց երբ տեսանք՝ ինչպես է աղավաղվում, հանրությունը օրենքի շրջանակներում որոշեց նախաձեռնել այս հարցը:
Նրա խոսքով՝ սա ընդդիմություն-իշխանություն կռիվ չէ, այլ սա հասարակություն է, որը մտահոգված է իր ճարտարապետական և մշակութային դեմքի պահպանմամբ, իսկ մյուս կողմից կառուցապատողն է և շինարարը, որի մոտ չեն աշխատում օրենքները: Նրա դիտարկմամբ՝ կատարվել է հանցագործություն:
Նա նշեց, որ Փակ շուկայի շուրջ ակցիաները կշարունակվեն:
