Մաքսային միությանը Հայաստանի անդամակցության շնորհիվ տնտեսվարող սուբյեկտների համար բավական լայն հնարավորություններ են բացվում: «Առաջին լրատվական»-ի հետ զրույցում նման տեսակետ հայտնեց Սփյուռքահայ ներդրողների պաշտպանության հիմնադրամի ներկայացուցիչ Նիկոլայ Բաղդասարյանը: Նա նկատեց, որ այսպիսով Հայաստանում գործող տնտեսվարող սուբյեկտների շահագրգռվածություն կառաջանա, ոչ թե սփյուռքահայ, քանի որ վերջիններս, գումար ներդնելով` ակնկալում են Հայաստանից լուրջ եկամուտներ ստանալ:
«Հարց է առաջանում` որքանո՞վ է ազատական լինելու շուկան, այստեղ առաջինը կշահեն Հայաստանում աշխատող տնտեսվարող սուբյեկտները, երկրորդ՝ սփյուռքահայ այն ներդրողները, ովքեր ակնկալում են ՌԴ-ի հետ լուրջ համագործակցություն ձևավորել: Միաժամանակ կավելանա ներդրողների թիվը, քանի որ փաստորեն շուկան ընդարձակում ենք, իսկ պետության ներսում շուկա չկա, որ սպառեն իրենց արտադրանքը»,- ասաց նա:
Բաղդասարյանը համոզված է, որ Մաքսային միությանն անդամակցումը նաև տնտեսվարող սուբյեկտների շահերն է շոշափում: Նրա խոսքերով` այս անդամակցումից լուրջ կշահի փաստաբանական ինստիտուտը: «Մենք արդեն որոշ պայմանագրեր ենք ստորագրել, որի շրջանակներում այն պետություններում, որոնք Մաքսային միության կազմում են, փաստաբաններն առանց խնդրի հնարավորություն կունենան գնալ և իրենց շահերը ներկայացնել Ռուսաստանի Դաշնությունում և այլ պետություններում»,- ասաց նա:
Բաղդասարյանը, ով նաև Փաստաբանական դպրոցի տնօրենն է, անդրադարձավ Հայաստանում գործող` ԵՄ-ի կողմից ֆինանսավորվող կառույցներին: Նա նկատեց, որ այստեղ կա քաղաքական խնդիր. հնարավոր տարբերակ է՝ ԵՄ-ն դադարեցնի ֆինանսավորումը: «Արդեն մի տարի է` ԵՄ-ն պիտի մեզ ֆինանսավորում տրամադրի։ Այն ժամանակ դեռ այս հարցով որևէ քննարկում չկար, սակայն մեզ մոտ խնդիր է ծագել` մեկ տարի է` մեր ֆինանսավորման գործընթացը ձգձգվում է: Դրամաշնորհային ծրագիր պիտի ներկայացվեր, որը նաև Փաստաբանական դպրոցի համար է, սակայն արդեն մեկ տարի է, այն չի կատարվում»,- ասաց նա` նշելով, որ ավելի մեծ հեռանկարներ կարող են բացվել Ռուսաստանի հետ, քան ԵՄ-ին միանալու դեպքում:
Բաղդասարյանը նշեց, որ եվրոպական կառույցներում իրենք քաղաքականությունը շարունակում են պահպանել. Փաստաբանական դպրոցում, օրինակ, ԵՄ-ի դրոշը դրած է, քանի որ իրենք հիմնական գումարը՝ չորս միլիոնը, ստացել են ԵՄ-ից: «Այնուամենայնիվ, հիմա, երբ երկրորդ գումարը պիտի հատկացներ, չի հատկացրել, սակայն կարծում եմ նա` անկախ մեր անդամագրվելու հանգամանքից՝ ֆինանսավորումը դադարեցնելու էր: Նրանք բավական բյուրոկրատական մարմին են, շատ դժվար են աշխատում, և դրա պատճառով մեր դրամաշնորհների տրամադրումը տևում է տարիուկես»,- ասաց նա:
