Վերաքննիչ քրեական դատարանում ավարտվել է Գրիգոր Տ.-ի գործով բերված վերաքննիչ բողոքի քննությունը:
Գործը քննվել է Տավուշի մարզի ընդհանուր իրավասության դատարանում Սամվել Մարդանյանի նախագահությամբ:
20-ամյա Գրիգորը մեղադրվում էր ծանր հանցագործության կատարման վերաբերյալ սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:
Ըստ դատական ակտի՝ Գրիգորը դեպքի պահին զինծառայող էր՝ ջոկի հրամանատար, կոչումով՝ ավագ սերժանտ:
Նա, գիտակցելով, որ իր տրամադրած տեղեկությունը սուտ է, 2015 թվականի հոկտեմբերի 8-ին հաղորդում է տվել, թե իրենց զորամասի զինծառայող, ավագ լեյտենանտ Արթուր Շ.-ն 2015 թվականի օգոստոսից մինչև հոկտեմբեր համածառայողների շրջանում իր մասին անվանարկող տեղեկություններ հրապարակելու սպառնալիքով՝ իբր ինքը իրավապահների հետ համագործակցող՝ «գործ տվող» է, 3 անգամ, համապատասխանաբար՝ 90 հազար դրամի, 100 հազար դրամի և 4 հազար դոլարի, ընդհանուրը՝ 2 միլիոն 82 հազար 600 դրամի պահանջ է ներկայացրել իրեն՝ շորթում է կատարել:
Գրիգորի հաղորդումը չի հաստատվել, նա մեղադրվել է սուտ մատնության համար:
Ընդհանուր իրավասության դատարանում Գրիգորն իրեն մեղավոր է ճանաչել: Նրա միջնորդությամբ գործը քննվել է արագացված ընթացակարգով:
Դատարանը հաշվի է առել, որ Գրիգորը զղջում է կատարածի համար, նա հաշտվել է տուժողի Արթուր Շ.-ի հետ, վերջինս բողոք կամ պահանջ չի ներկայացրել:
Գրիգոր Տ.-ն մեղավոր էր ճանաչվել մեղսագրված արարքի համար և դատապարտվել էր 1 տարի իրական ազատազրկման: Պատժի սկիզբը պետք է հաշվվեր Գրիգորին փաստացի կալանքի տակ առնելու պահից, եթե դատավճիռն օրինական ուժ ստանար:
Այս դատավճռի դեմ վերաքննիչ բողոք էր ներկայացրել Գրիգոր Տ.-ի շահերի պաշտպան, փաստաբան Հ. Հարությունյանը՝ խնդրելով պատժի մասով բեկանել և փոփոխել դատավճիռը, Գրիգորի նկատմամբ կիրառել պայմանական դատապարտություն, սահմանել փորձաշրջան, նրան իրական ազատազրկման չդատապարտել:
Փաստաբանը նշել էր, որ Գրիգորը ծառայողական բնութագրի համաձայն՝ լավ, բարեխիղճ զինվոր է, նա հոգ է տանում ծնողների համար, իսկ եղբայրը ժամկետային զինծառայող է:
Դեպքից հետո Գրիգորը մոտ 1 տարի 6 ամիս ծառայությունը շարունակել է սահմանամերձ զորամասում, դրսևորել է պատշաճ վարքագիծ:
Վերաքննիչ դատարանը հաշվի է առել Գրիգոր Տ.-ի ծառայությունը պետության առջև՝ զինված ուժերում: Նա ժամկետային զինծառայությունն ավարտելուց հետո պայմանագրային հիմունքներով շարունակել է ծառայությունը զինված ուժերում, իրեն դրսևորել է որպես պարտաճանաչ զինծառայող:
Վերաքննիչ քրեական դատարանը՝ Մ. Պետրոսյան, Ա. Խաչատրյան, Ս. Համբարձումյան կազմով, պաշտպանի վերաքննիչ բողոքը բավարարել է՝ ընդհանուր իրավասության դատարանի դատավճիռը փոփոխել է պատժի մասով:
Գրիգոր Տ.-ն դատապարտվել է 1 տարի ազատազրկման, նրա նկատմամբ պայմանական դատապարտություն է կիրառվել ու սահմանվել է 1 տարի փորձաշրջան:
Փորձաշրջանը նա կանցկացնի ըստ ծառայության վայրի:
