Քաղաքային իշխանությունները կոչ են անում բազմամիլիոնանոց Բանկոկի բնակիչներին հրաժարվել անձնական ավտոտրանսպորտի օգտագործումից… գոնե մեկ օրով: Սեպտեմբերի 22-ը այդ ասիական մեգապոլիսում հայտարարվել է Առանց ավտոմեքենաների օր:
Ակցիան, ինչպես նախատեսում են կազմակերպիչները, պետք է թույլ տա բանկոկցիներին գոնե մեկ օր ազատ շնչել: Ըստ տրանսպորտի վարչության տվյալների՝ թայլանդական մայրաքաղաքի փողոցներով հիմա երթևեկում է գրեթե 8 մլն ավտոմեքենա: 2011-ից քաղաքում երթևեկության շարժման միջին արագությունը կտրուկ նվազում է: Իսկ գիշերն ու ցերեկը Բանկոկի փողոցներում օդը հագեցած է գազերով:
Առանց ավտոմեքենաների օրվա կարգախոսը կդառնա «Զիջիր ճանապարհը» արտահայտությունը: Նրանց, ովքեր կմիանան ակցիային, առաջարկվում է ձեռք բերել ավելի քան 0.5 դոլար արժողությամբ հուշանշաններ: Կրծքին նման նշանով մարդիկ ողջ սեպտեմբերի 22-ի ընթացքում կարող են անվճար երթևեկել մետրոյով, քաղաքային ավտոբուսներով: Բանկոկի պատմական հատվածում, ի պատիվ Հրաժարվելու օրվա, ցուցահանդեսներ և հեծանիվներով մրցավազքեր տեղի կունենան:
