Հայաստանում մարդկանց 80 տոկոսը կարծում է, որ քաղաքական գործիչները, կուսակցությունները մտածում են իրենց առաջնորդի մասին, նույն 80 տոկոսը մտածում է, որ պետությունը ավելի շատ հարուստների մասին է մտածում, քան աղքատների: Սա նշանակում է, որ ՀՀ բնակչության 80 տոկոսը իրեն օտարված է զգում վերնախավից, պետական կառավարման համակարգից: Այս մասին Մեդիա կենտրոնում լրագրողների հետ հանդիպմանն ասաց սոցիոլոգ Սամվել Մանուկյանը՝ ամփոփելով ԱԺ ընտրությունները սոցիոլոգիայի տեսանկյունից:
Սոցիոլոգի կարծիքով, մարդիկ տեսնում են, որ նրանք, ովքեր առաջնորդում էին բողոքի ցույցերը, ինչ-որ պահի հետ են կանգնում, և ժողովուրդը մնում է կոտրած տաշտակի առաջ. «Այսինքն՝ հիմա ժողովուրդը մեջքով է շրջված վերնախավերին: Թե՛ իշխանական, թե՛ ընդդիմադիր կուսակցությունների հանդեպ վերաբերմունքը նույնն է»:
Խոսելով այն մասին, որ մարդիկ ընտրակաշառք են վերցնում, Մանուկյանը նշեց, որ սովորաբար Հայաստանում ընտրությունների գնալիս մարդը նայում է, թե ում է ընտրելու, տվյալ անձը ինչ փորձ ունի, որքան փող ունի և ինչ կարող է անել, ինչ է խոստանում: «Հենց այդ խոստումն է, որ բանավոր խոսքով կոչվում է ընտրակաշառք իսկ գրավոր խոսքով` նախընտրական ծրագիր:
Հասարակությունն առհասարակ, ըստ Սամվել Մանուկյանի, շատ լավ տեսնում է նաև քաղաքական ուժերի և գործիչների քաղաքական առևտուրը և ինքն էլ գնում առևտրի:
Մանրամասները՝ տեսանյութում:
