Մարտի 26-ին Վազգեն Սարգսյանի անվան «Հանրապետական» մարզադաշտում կայանալիք աշխարհի առաջնության ընտրական փուլի Հայաստան-Ղազախստան հանդիպումից առաջ ֆուտբոլասերների շրջանում տոմսերի գնի հետ կապված դժգոհության ալիք է բարձրացել: Մի խումբ երկրպագուներ նույնիսկ առաջարկել են բոյկոտել այս հանդիպումը:
Հիշեցնենք, որ Հայաստան-Ղազախստան հանդիպման տոմսերն արժեն 4-10 հազար դրամ, մինչդեռ հարևան Վրաստանում և Ադրբեջանում ազգային հավաքականի մասնակցությամբ պաշտոնական խաղերի տոմսերը 8-10 անգամ ավելի էժան են: Այս խնդրի, ինչպես նաև Հայաստանի ազգային հավաքականին վերաբերող այլ հարցերի շուրջ «Առաջին լրատվական»-ը զրուցել է երկրպագուների «Առաջին հայկական ճակատ» շարժման հիմնադիր անդամ Սերգեյ Ջանջոյանի հետ:
– Ինչպիսի՞ն է Ձեր դիրքորոշումը տոմսերի թանկ լինելու հարցում, որի հետևանքով հազարավոր երկրպագուներ ուղղակի զրկվել են ազգային թիմի հանդիպումները դիտելու հնարավորությունից:
– Տոմսերի թանկ լինելը ծեծված թեմա է, այստեղ հասարակ հաշվարկներ, մարդկային տրամաբանություն չի գործում: Այստեղ գործում են ոչ պրոֆեսիոնալ մոտեցում, ինչ-որ պրինցիպներ և այլն: Տրամաբանությունից դուրս է, երբ Պորտուգալիայի, Ռումինիայի, Ղազախստանի հավաքականների հետ նույն արժողությամբ տոմսեր են թողարկվում: Տոմսերի թեմայով հնարավոր առիթներով մենք ակցիաներ ենք իրականացնելու:
– Շատ երկրպագուներ առաջարկել են բոյկոտել առաջիկա մրցավեճը և նույնիսկ մեջքով շրջվել Հայաստանի հավաքականին: Կարծում եք՝ դա դրական հետևանք կարո՞ղ է ունենալ:
– Անլուրջ եմ համարում հավաքականին մեջքով շրջվելու լուրերը: Հավաքականի տղաները մեղք չունեն տոմսերի սահմանված գների համար: Պետք է ուղղակի պարբերաբար քաղաքակիրթ ակցիաներ իրականացնել այս հարցով: Օրինակ՝ եթե տրիբունաները խաղերից առաջ մանրադրամներ նետեն դաշտ կամ նմանատիպ ակցիաներ, ուշ թե շուտ արդյունք կլինի: Ցավոք, այդպես չի լինի մեզ մոտ, քանի որ շատերը օգտվում են անվճար տոմսերի քաղաքականությունից: Ծանր է շատերի սոցիալական վիճակը: Նմանատիպ ակցիա միայն մեր անելու դեպքում հերթական զրպարտությունը կկպցնեն ՖԱՖ-ին:
– Ղազախստանի հետ հանդիպման ժամանակ կամ խաղի նախօրեին Դուք պատրաստվո՞ւմ եք որևէ ակցիա իրականացնել:
– Պատրաստվում ենք երթով շարժվել մարզադաշտ և 90 րոպե աջակցություն ցուցաբերել հավաքականին: Լինելու ենք հյուսիսային տրիբունայւմ: Տոմսեր ձեռք բերելու հետ կապված կա որոշակի արհեստական խոչընդոտ՝ մեր վերևի հատվածում շուրջ 1000 տեղ արգելափակված է: Կարծում եմ՝ դա արվում է, որ մարդիկ չկարողանան մեր տրիբունայի տոմս ձեռք բերել, մեզ մոտ լինել, բայց խաղին ավելի մոտ կբացվեն այդ տեղերը: Մարտի 26-ին, ժամը 17-ին, հավաքվելու ենք Արամ Խաչատրյանի արձանի մոտ:
– Անդրադառնանք առաջիկա հանդիպմանը: Հայաստանի հավաքականի հաղթելու հավանականությունը մե՞ծ է:
– Իհարկե, վերջապես մենք բացահայտ ֆավորիտ ենք: Շատերը խոսում են վստահ հաղթանակի մասին, բայց պետք է աչալուրջ լինել: Ես հավաքականի խաղերից ամենամեծ հիասթափություններից մեկն ապրել եմ 2008-ին՝ Երևանում ղազախներին պարտվելով: Այն ժամանակ էլ էինք մենք ֆավորիտ՝ խմբում մի շարք տպավորիչ հաղթանակներ տանելուց հետո:
– Մեր հավաքականում գլխավոր խնդիրը բարձրակարգ դարպասապահի բացակայությունն է: Ձեր կարծիքով՝ գլխավոր մարզիչ Արթուր Պետրոսյանն ո՞ւմ կվստահի Ղազախստանի հետ մրցավեճում, և ինչպե՞ս եք պատկերացնում առկա խնդրի գլոբալ լուծումը:
– Համաձայն եմ այն կարծիքի հետ, որ ռիսկի գնալ պետք չէ: Բեգլարյանն իրեն դրսևորել է, որոշ խաղերում նույնիսկ հերոսացել է: Հիմա փորձարկման ժամանակը չէ: Իսկ գլոբալ առումով, կարծում եմ, հարցը դեռևս լուծում չունի: Հայաստանում ուժեղ դարպասապահներ ստանալ, ունենալով 6-7 ակումբ, իրատեսական չէ, պետք է փնտրել երիտասարդ դարպասապահներ սփյուռքից:
– Բրիտանական որոշ ԶԼՄ-ներ կարծիք էին հայտնել, որ Մխիթարյանը «Միդլսբրոյի» հետ հանդիպումը բաց է թողել վնասվածքի պատճառով: Հնարավո՞ր եք համարում ռիսկի չդիմելու նպատակով մեր հավաքականի ավագի չմասնակցելը Ղազախստանի հանդիպմանը:
– Կարծում եմ՝ «Մանչեսթերի» մարզիչը փորձ էր անում վնասվածքի քողի տակ Հենոյին թույլ չտալ միանալ Հայաստանի հավաքականին՝ վնասվածք, հոգնածություն ստանալու ռիսկերից խուսափելու համար: Շատ հնարավոր է՝ Հենոն իր խոսքն է ասել և ամեն գնով ժամանել հավաքականի ճամբար: Կարծում եմ՝ Հենոն պատրաստ է և մեկնարկից կխաղա առաջիկա մրցավեճում:
– Արթուր Պետրոսյանի նշանակումը և Մոնտենեգրոյի նկատմամբ տարած փայլուն հաղթանակը ստեղծե՞ց հնարավորություն ենթախմբում երկրորդ հորիզոնականի համար պայքարելու:
– Դեռ միանշանակ վաղ է խմբից դուրս գալու մասին մտածել: Ղազախների նկատմամբ հաղթանակի հասնելու դեպքում շանսերը կմեծանան, բայց այդ հաղթանակն էլ լուրջ նախադրյալ չէ: Խմբից դուրս գալու մասին կխոսենք, երբ դրսում Մոնտենեգրոյին կամ Երևանում Դանիային, Լեհաստանին հաղթենք:
– Ի՞նչ հաշվով կավարտվի Հայաստան-Ղազախստան հանդիպումը:
– Կարծում եմ՝ ոչ հեշտ պայքարում կհաղթենք 1 գնդակի տարբերությամբ, հաշիվ չեմ կարող ասել։
– Անդրադառնանք նաև «Առաջին հայկական ճակատ» շարժմանը: Ինչպե՞ս է զարգանում ՖԱՖ-ը, և ի՞նչ ծրագրեր ունեք առաջիկայում:
– Այս տարի նշելու ենք շարժման 10-ամյակը։ Յուրովի պատրաստվելու ենք հավաքականի յուրաքանչյուր հանդիպմանը։ Լավ օրեր չեն հայկական ֆուտբոլում, փորձելու ենք մեր ներդրումն ունենալ նոր հաղթանակների ու տարբեր խնդիրների կարգավորման մեջ։
– Ներկայում որքա՞ն անդամ ունի ակումբը:
– Հայաստանում, Արցախում՝ շուրջ 700, Եվրոպայում և աշխարհի այլ ծայրերում՝ շուրջ 200 անդամ:
