Ազգային ժողովի փոխնախագահ էդուարդ Շարմազանովն անդրադարձել է Արարատի մարզի Սայաթ Նովա համայնքում ՀՀԿ անդամի կողմից ԲՀԿ-ականի դանակահարելու մասին լուրերին: Ազգային ժողովում լրագրողների հետ զրույցում Էդուարդ Շարմազանովն ընդգծեց, որ այդ հարցով պետք է զբաղվեն իրավապահները:
«Եթե կա օրենքի խախտում, եթե կա հանցագործություն, անկախ նրանից, թե ում թիմակիցներն են արել, ունի դա քաղաքական դրդապատճառ, թե ոչ, բոլորը պետք է պատժվեն: Ես բացահայտ ասում եմ՝ բոլոր նրանք, ովքեր կփորձեն նախընտրական, քաղաքական պայքարը վերածել բռունցքների պայքարի, խստագույնս կպատժվեն օրենքի ողջ խստությամբ: Կպատժվեն նաև նրանք, ովքեր կփորձեն ապատեղեկատվություն տարածել»,- ասաց Շարմազանովը:
Նա հավելեց, որ իշխանություններն ամեն ինչ անելու են, որպեսզի ընտրությունները լինեն օրինականության սահմաններում: «Մնացածը իրավապահների խնդիրն է և ձեր, որպեսզի վեր հանեք այդ ամենը: Ես վստահ եմ, որ չկա մի դեպք, որին մեր իրավապահները չարձագանքեն»,- նշեց նա:
