ՄԱԿ-ի Անվտանգության խորհուրդը պետք է կատարի իր առաջնահերթ պարտականությունները՝ կապված Սիրիայում տիրող իրավիճակի հետ: Այս մասին ITAR-TASS-ին հաղորդել է Թուրքիայի ԱԳՆ ներկայացուցիչ Լևենտ Գյումրյուչքյուն:
«ՄԱԿ-ի առաջնահերթ պարտականությունն է ապահովել խաղաղությունն ու միջազգային անվտանգությունը: Ակնհայտ է, որ Սիրիայում իրավիճակը սպառնալիք է տարածաշրջանային և համաշխարհային անվտանգությանը: Մենք ՄԱԿ-ին կոչ ենք անում անհապաղ սկսել գործել, չի կարելի շարունակել լռել»,- ասել է նա:
Դիվանագետը նշել է, որ Թուրքիան սպասում է Անվտանգության խորհրդի որոշմանը, և եթե այն չլինի, ակտուալ կդառնան այլ տարբերակներ:
Գյումրյուչքյուն ընդգծել է, որ Սիրիայում քիմիական զենքի օգտագործման կապակցությամբ ոտնահարվել է միջազգային իրավունքի դրույթը, իսկ Ալ-Ասադի վարչակարգը պետք է պատասխան տա կատարած հանցագործությունների համար:
«Եթե ՄԱԿ-ը չկարողանա որոշում կայացնել, ապա միջազգային հանրությունը պետք է այն մշակի: Եթե այդ դեպքում կոալիցիա ձևավորելու մասին որոշում կայացվի, Թուրքիան կանդամակցի դրան: Այստեղ առանցքային բառ է «եթե»-ն»,- ասել է դիվանագետը:
Թուրքիայի ԱԳՆ ներկայացուցիչը հույս է հայտնել, որ ՄԱԿ-ը չի կարող անմասն մնալ: Նրա խոսքերով՝ հակասիրիական կոալիցիայի ստեղծման, ձևաչափի, նպատակների և խնդիրների վերաբերյալ հստակ ծրագրեր չկան:
Նա չի մեկնաբանել Սիրիայի ճգնաժամին ռազմական միջամտության ծրագրերը: Դիվանագետը շահարկում է անվանել տեղեկատվությունն այն մասին, որ Ինջիրլիք ռազմաօդային թուրքական բազան հավանաբար կկիրառվի Սիրիայի դեմ գործողություն իրականացնելու համար:
«Տվյալ պահին դրանք միայն շահարկումներ են»,- հավելել է նա: