Քաղաքապետարանի առջև անժամկետ նստացույց անող երիտասարդներն այսօր հայտարարեցին, որ արդեն մի քանի օր է, ինչ մի խումբ անձինք ծեծում և սպառնում են ակտիվիստներին:
Ակտիվիստ Սուրեն Սահակյանի խոսքով՝ սպառնալիքներ են հնչել նաև քաղաքապետարանի մոտ: Երեք օր առաջ սև մեքենա է կանգնել, սպառնացել տեղում գտնվող միակ ակտիվիստին և հեռացել. «Հայտարարել են, թե ընտանիքներն են վնասելու, սեռական բնույթի հայհոյանքներ են հնչեցրել: Այս մասին որոշ ժամանակ անց տեղյակ ենք պահել ոստիկանությանը, բայց նրանց միակ արձագանքը հետևյալն է՝ համեցեք բաժին, դիմում տվեք այդ մասին, փորձենք ճշտել: Ոստիկանությունը անգործություն է ցուցաբերել և ընթացք չի տվել գործին՝ չնայած մեր բանավոր բողոքներին»:
Երիտասարդները ոստիկանությունից պահանջել են անվտանգության նկատառումներից ելնելով գիշերը մեկ հերթապահ ոստիկան նշանակել քաղաքապետարանի առջև, սակայն դա էլ չի արվել. «Զուտ նրա համար, որ ոստիկանի ներկայությունը հանցագործի վրա ազդեցություն կունենա, մենք ուզում էինք, որ տարածքում գիշերը մի ոստիկան լիներ: Բացի այդ, մենք ֆիզիկական ուժ կիրառելու իրավունք չունենք, իսկ ոստիկանությունն այդ իրավունքն ունի»:
Երիտասարդները իրենց անվտանգության նպատակով մի քանի օր քնել են քաղաքապետարանի աստիճանահարթակին՝ տեսախցիկների տակ: Երեք օր անց ակտիվիստներից Վահագնին բերման են ենթարկել և զգուշացրել, որ աստիճանահարթակներից այն կողմ գիշերի: Վահագնի պնդմամբ՝ այդ օրը քաղաքապետը մինչև ուշ գիշեր մնացել էր քաղաքապետարանում, դրա համար էլ իրեն տարել են տարածքից: Նա հավատացած է՝ քաղաքապետարանն ու ոստիկանությունը պայմանավորված են գործում:
Ակտիվիստներն ասացին նաև, որ հանցագործություն իրականացնողները տասը հոգի են, ովքեր ոչ միայն մարդ են ծեծում, այլև գողություններ անում. «Երկու օր առաջ հեռախոս են գողացել, երեկ՝ ոսկյա շղթա: Մենք քաղաքապետարանի առջև մեզ ապահով չենք զգում»,- հավելեց Սուրեն Սահակյանը:
Մանրամասները դիտեք տեսանյութում:
