Թուրքական Milliyet թերթը, վկայակոչելով Իսրայելի կառավարությանը մոտ կանգնած DEBKA հետախուզական կայքը, նշում է, որ Սիրիայի նախագահ Բաշար Ասադն արագորեն կորցնում է Թուրքիայի վարչապետ Էրդողանի ու մուսուլմանական աշխարհի աջակցությունը:
DEBKA-ի տվյալներով, Էրդողանը կառավարության ներկայացուցիչների հետ դռնփակ հանդիպման ժամանակ նույնիսկ հրահանգել է կարճ ժամանակահատվածում խզել Դամասկոսի հետ հարաբերությունները: Դա հիմնականում պայմանավորված է քրդական գործոնով:
Էրդողանի վճիռն ազդեցություն կունենա թուրք-իսրայելական հարաբերությունների վրա: Էրդողանը սիրիական ընդդիմադիր առաջնորդներին թույլատրել է մայիսի 31-ից հունիսի 2-ը հանդիպումներ ունենալ Թուրքիայում: Օրեր առաջ նրանք արդեն իսկ այցելել են Ստամբուլ:
Հիշեցնենք, որ Էրդողանն ու արտգործնախարար Ահմեդ Դավութօղլուն բազմիցս Ասադին կոչ արեցին բարեփոխումներ իրականացնել և վերջ դնել ցուցարարների ուղղությամբ կրակ բացելուն: Սակայն Ասադը չանսաց նրանց: Սիրիայում զոհված ցուցարարների քանակն արդեն անցել է հազարից:
Երբ ապրիլի սկզբին Սիրիայի քրդերը սպառնացին ապստամբություն բարձրացնել, Էրդողանն անմիջապես Ասադին խորհուրդ տվեց ոչ մի գնով հրաժարական չտալ և բարեփոխումներ իրականացնել.
«Սիրիական զարգացումներն անմիջականորեն իրենց ազդեցությունն են ունենում հարևան Թուրքիայի վրա: Թուրքիայի համար մեծ վտանգ են ներկայացնում Սիրիայում բնակվող 1.4 միլիոն քրդերը: Եթե նախագահ Բաշար Ասադը հրաժարական տա, ապա 1.4 միլիոն սիրիական քրդերը` Թուրքիայում բնակվող 15 միլիոն, Իրանում՝ 7 և Հյուսիսային Իրաքում՝ 6 միլիոն քրդերի հետ միասին ոտքի կկանգնեն և միացյալ անկախ պետության պահանջ կդնեն»:
