Մալթայի Ինքնիշխան Մարտական Ուխտի արքայազն և մեծ վարպետ Ֆրա Մեթյու Ֆեսթինգը Հռոմի պապ Ֆրանցիսկոսի հետ հանդիպումից հետո հրաժարական է տվել։ Նրանց միջև տարաձայնություններ են առաջացել անցած տարի շքանշանի բարձրաստիճան ներկայացուցիչներից մեկին պաշտոնից զրկելու պատճառով, որը ճանաչում էր ձեռք բերել Ասիայում սեռական ստրկության զոհերի շրջանում հակաբեղմնավորիչ միջոցների տարածումը խրախուսելու համար։
Ինչպես հաղորդում է National Catholic Register-ը՝ վկայակոչելով Մալթայի շքանշանի պաշտոնական ներկայացուցչին, Մեթյու Ֆեսթինգը հրաժարական է տվել Հռոմի պապի հետ հանդիպելուց հետո։ «Պապը խնդրել է նրան լքել պաշտոնը, և նա համաձայնվել է»,- ասել է շքանշանի ներկայացուցիչը՝ հավելելով, որ հիմա ինքնիշխան խորհուրդը պետք է պաշտոնապես ընդունի նրա հրաժարականը։
Նշենք, որ մեծ վարպետի պաշտոնը Ֆեսթինգը զբաղեցնում է 2008թ.-ից: Մարտական Ուխտի արքայազններն այդ պաշտոնը սովորաբար զբաղեցնում են ցմահ: Մեթյու Ֆեսթինգը 2016թ. հոկտեմբերին այցելել էր Հայաստան։
Ինչպես հաղորդում է kommersant․ru-ն, նման արարքի պատճառը Վատիկանի հետ կոնֆլիկտն է, որը ծագել էր դեռևս անցած տարի՝ Մալթայի ուխտի կանցլեր Ալբրեխտ ֆոն Բեզլագերի պաշտոնանկության պատճառով։ Նրան երկու անգամ խնդրել են հրաժարական տալ այն կապակցությամբ, որ նա թույլ է տվել բարեգործական ակցիա անցկացնել Մյանմարում, որի ընթացքում սեռական ստրկության զոհերին պահպանակներ են բաժանել, ինչն անթույլատրելի է համարվում։ Սակայն կանցլերը հրաժարվել է ինքնակամ լքել պաշտոնը, և արդյունքում նրան հեռացրել են։ Կանցլերը, չհամաձայնվելով որոշման հետ, օգնության խնդրանքով դիմել է Հռոմի պապին, որն առանձնանում է իր առաջադեմ հայացքներով։
Հռոմի պապը հատուկ հանձնաժողով է ստեղծում տեղի ունեցածը հետաքննելու համար, սակայն Մեթյու Ֆեսթինգը նրա որոշումը որակում է որպես միջամտություն Մալթայի ուխտի ներքին գործերին և հրաժարվում է համագործակցել Վատիկանի հետ։ Հռոմի պապն արդյունքում մեծ վարպետ Ֆեսթինգին հրավիրում է իր մոտ և խնդրում լքել պաշտոնը։
