ՀՀԿ-ն գումարել է Սերժ Սարգսյանի հետարձակուրդային շրջանի Գերագույն մարմնի առաջին նիստը, որի ընթացքում որոշվել է թիվ 38 ընտրատարածքում մեծամասնական ընտրակարգով առաջադրվելիք թեկնածուի անունը: Արմեն Կարապետյան՝ Կապանի նախկին քաղաքապետ, Սյունիքի կուսակցական կառույցի խորհրդի անդամ:
Հիշեցնենք, որ թիվ 38 ընտրատարածքում մանդատը թափուր է մնացել այն բանից հետո, երբ Սյունիքի նախկին մարզպետ Լիսկայի՝ Սուրիկ Խաչատրյանի տան մոտ տեղի ունեցած ողբերգական միջադեպից հետո Սյունիքի մարզպետը հասարակական ճնշման տակ հրաժարական տվեց, իսկ նրա փոխարեն մի քանի շաբաթ հետո մարզպետ նշանակվեց պատգամավոր, ՀՀԿ-ական Վահե Հակոբյանը՝ Կապանի լեռնամետալուրգիական կոմբինատի տնօրեն Մաքսիմ Հակոբյանի որդին: Եվ ահա, ՀՀԿ-ն լրացնում է թափուր մնացած մանդատը՝ առաջադրելով Արմեն Կարապետյանին, որի թեկնածությունն առաջ էր քաշել Սյունիքի կուսակցական խորհուրդը՝ Լիսկայի գլխավորությամբ: Այլ կերպ ասած, ՀՀԿ գործկոմը հաստատում է այն թեկնածությունը, որն առաջ էր քաշել Լիսկան: Թեև կարծեք թե պարզ է, որ Լիսկան իրականում առաջ է քաշել այն թեկնածությունը, որը նրան ասել են Երևանից:
Պակաս հավանական չէ նաև այն, որ Երևանից հենց Լիսկային են վստահել թափուր մանդատի թեկնածուի ընտրությունը տեղում: Այս դեպքում, Սերժ Սարգսյանի հետարձակուրդային գործունեության սկզբում, ՀՀԿ-ն, ըստ էության, վստահության մանդատ է տալիս Լիսկային՝ հավանության արժանացնելով նրա թեկնածությունը:
Սա, անշուշտ, Սերժ Սարգսյանի բավականին խոստումնալից վերադարձ է դեպի «քաղաքական թատերաբեմ»: Մնում է, որ Լիսկան պաշտոնապես նշանակվի Սերժ Սարգսյանի խորհրդական, առավել ևս, որ Հայաստանում նախագահի խորհրդականների ինստիտուտը, ըստ էության, վեր է ածվել գործազուրկ պաշտոնյաների բարոյահոգեբանական ռեաբիլիտացիայի և մխիթարության օբյեկտի:
Այս որոշումը առաջին հայացքից ամենևին առանցքային չէ Հայաստանի խնդիրների և ներքաղաքական ու արտաքին քաղաքական անցուդարձի համատեքստում, սակայն թիվ 38 ընտրատարածքի մանդատի թեկնածուի որոշման հարցում ներգրավելով Լիսկային ու նաև հետագայում ՀՀԿ գործկոմով հաստատելով նրա որոշումը՝ ՀՀԿ-ն, ըստ էության, հասարակությանը ցույց է տալիս, որ իրականում բացարձակապես մտադրություն չունի հենց այնպես հանձնել յուրայիններին: Կարող էին, չէ՞, Լիսկային հեռու պահել որոշումից, առավել ևս, որ տեղեկություններ տարածվեցին Հայաստանից նրա հեռանալու մասին: Սակայն Սերժ Սարգսյանն ու իշխող կուսակցությունըսրա փոխարեն պարզապես մարտահրավեր նետեցին հասարակությանը՝ ցույց տալով, որ Լիսկան իրենց համար անփոխարինելի է:
Սա նաև Սյունիքում Լիսկայի իշխանության դրսևորում էր: Այսինքն՝ նա թողել է պետական պաշտոնը, սակայն քանի որ Հայաստանում ոչ թե պետական, այլ կուսակցական-խմբային կառավարում է, ապա կարևոր է Լիսկայի կուսակցական պաշտոնի և դերակատարման ճակատագիրը: Իսկ այստեղ նա շարունակում է մնալ ձիու վրա, ինչը նշանակում է, որ Սյունիքը շարունակելու է Լիսկային ծառայել որպես գամակ:
