Օրեր առաջ Facebook սոցիալական ցանցի օգտատերերից Լիլիթ Ումրշատյանը տարածել էր հայ բեմի և կինոյի ամենապայծառ դեմքերից մեկի, տաղանդավոր դերասանուհու, հայ կինոյում և թատրոնում բազում անկրկնելի կերպարներ կերտած արտիստուհու, հայ հանճարեղ արտիստի՝ Մհեր Մկրտչյանի առաջին տիկնոջ, Դոնարա Մկրտչյանի լքված շիրիմի լուսանկարը:
Շնորհակալություն հայտնելով Լիլիթին խնդիրը բարձրացնելու համար, webtv.am առաջին հայկական մշակութային ինտերնետ հեռուստատեսության թիմը նախաձեռնում է Դոնարա Մկրտչյանի շիրիմի ամբողջական բարեկարգումը և շիրմաքարի տեղադրումը, որին վստահ ենք, կաջակցեն մեր շատ հայրենակիցներ Հայաստանից և սփյուռքից, գործարարներ, արվեստի և մշակույթի ճշմարիտ նվիրյալներ:
Մեր ներկայացուցիչներն արդեն եղել են գերեզմանատանը, փաստաթղթային ճշգրտումներով համոզվել, որ լքված գերեզմանոցում թաղված է Դոնարա Մկրտչյանը, գերեզմանատան տնօրինության հետ քննարկել են Դոնարա Մկրտչյանի գերեզմանոցի ամբողջական բարեկարգման և շիրմաքարի տեղադրման մոտավոր ծախսերը, որը կկազմի մոտ 2.500.000 ՀՀ դրամ:
Բանակցություններ են տարվել նաև մեր լավագույն արվեստագետներից ոմանց հետ՝ Դոնարա Մկրտչյանի հուշաքարը նախագծելու խնդրով: Համապատասխան գումարը հավաքագրելուց հետո անպայման կհայտարարվի դրա մասին և անմիջապես կսկսվի աշխատանքների իրագործումը:
Բարերարների ցանկության դեպքում նրանց անունները կթողնվեն փոքրիկ հուշատախտակի վրա:
Դերասանուհու շիրիմն ամբողջությամբ բարեկարգելուց հետո կկատարվի համապատասխան արարողություն:
Դոնարա Մկրտչյանը ոչ միայն կարճ արտիստական կյանք ապրած ու հայ մշակույթի մեջ առանձնացած դերասանուհի է, ոչ միայն բազմաթիվ տաղանդավոր կերպարներ է կերտել հայ կինոյում ու թատրոնում, այլ նաև հայ հանճարներից Մհեր Մկրտչյանի առաջին կինն է, ով իր կյանքի գրեթե քսան տարին անցկացրեց Սևանի հոգեբուժարանում և մահացավ՝ անտեղյակ լինելով իր ընտանիքի դաժան ճակատագրի պատմությանը:
Այն, որ Դոնարա Մկրտչյանի շիրիմը լքված է, խոսում է մեր մշակութային քաղաքականության մասին, այն արժեհամակարգի մասին, որ իշխող է այսօր, բայց մենք ունենք նաև հասարակություն, որն իր փոքրիկ աջակցությամբ կարող է գոնե այս պարագայում արժանին մատուցել տաղանդավոր դերասանուհուն:
Հաշիվը բացված է Զարգացման Հայկական բանկում:
Հաշվեհամարներն են՝
ՀՀ դրամով՝ 1810004369880400
ԱՄՆ դոլարով՝ 1810004369880101
Եվրոյով՝ 1810004369880150
ՌԴ ռուբլով՝ 1810004369880158
Webtv.am Հեռ. 091 27 07 76
