«Առաջին լրատվական»-ի զրուցակիցն է հրապարակախոս Արծրուն Պեպանյանը:
Պարոն Պեպանյան, նախընտրական այս փուլն ինչպե՞ս եք գնահատում: Հայտարարվեց, որ ՀԱԿ ցուցակը կգլխավորի Լևոն Տեր-Պետրոսյանը, ՀՀԿ-ն՝ Սերժ Սարգսյանը: Հայաստանը արդիականանալու ներուժ չունի՞:
– Մենք գտնվում ենք քաղաքական մտքի խոր ամլության փուլում: Դրա վառ ապացույցն է այն, որ քաղաքական դաշտում հիմնականում նրանք են, ովքեր ժամանակին մեղադրվում էին երկիրը անդունդ տանելու մեջ, իսկ հիմա պայքարում են նրանց դեմ, ում հիմա է ներկայացվում նույն մեղադրանքը: Այլ լուրջ հոսանք չկա: Քաղաքական մտքի այս ամլությունն ունի իր բացատրությունը. ավելի քան հազար տարի պետություն չունենալով` մենք մեր ուղեղը չենք մարզել մեծ խնդիրների լուծում գտնելով: Ու հիմա գերբարդ մեր իրականությանը նայում ենք կենցաղային մանր խնդիր լուծողի մոտեցումով, դրա համար էլ ելքը չենք տեսնում: Առաջին հանրապետության շրջանի մեր մեծերը տխրությամբ փաստել են, որ հայությանը խեղդում է մտավոր մակերեսայնությունը: Ու այդ մակերեսայնությունը թույլ չի տալիս, որ կարդան ասածս մեծերին, մինչդեռ նրանք նկարագրել են ելքի ուղին:
Տեսակետ կա, որ իշխանությունը փորձում է վերահսկելի ընդդիմություն ստեղծել, և դրա համար Գագիկ Ծառուկյանին հետ բերելու անհրաժեշտություն առաջացավ: Համամի՞տ եք: Ի վերջո ինչո՞ւ է վերադառնում Ծառուկյանը:
– Եթե մեր երկրում միլիարդատերը մտնում է քաղաքականության մեջ, ապա նա կամ իշխանությունների պրոյեկտ է, կամ դրսի հզոր ուժերի աջակցությունն է վայելում: Եթե ոչ մեկն է, ոչ մյուսը, ապա արժանանում է Սուքիասյանի ճակատագրին: Թե ինչու է վերադառնում Ծառուկյանը, հետո կպարզվի: Ասել եմ թե՛ 2006-ին, թե՛ հիմա եմ կրկնում` ԲՀԿ-ն կարող էր և դրական դերակատարություն ունենալ երկրի կյանքում, եթե գնա ճիշտ ճանապարհով: Այդ ճանապարհը ես նկարագրել եմ 2006-ին ԲՀԿ ակտիվի առաջ ունեցած դասախոսության մեջ, բայց իրենք գնացին այլ ճանապարհով:
Ի՞նչ կարծիք ունեք ձևավորվող դաշինքների վերաբերյալ: Որքանո՞վ դրանք կարող են հաջողել, իրական այլընտրանք դառնալ իշխանությանը: Դրա հնարավորությունը տեսնո՞ւմ եք արդյոք:
-Այսօր ծանրակշիռ ընդդիմադիր քաղաքական ուժ չկա: Բոլորը փոքր մեծություններ են, ու դրանց միավորումը նույնպես փոքր մեծություն է լինելու: Տեսականորեն հնարավորություն կա ակտիվացնել վհատությանը տրված ժողովրդին, բայց դա անել կարող են ազգայնականություն կրող շրջանակները: Մինչդեռ քաղաքական դաշտում եղածները այդ հատվածից չեն:
Ըստ Ձեզ՝ կա՞ ՀՀԿ-ում ներկուսակցական ինտրիգ, արդյոք պայթյուն կարո՞ղ է լինել հենց ներսից:
– Խմորումներ եղել են ժամանակին, ու կառավարության ներկա` մարդամոտ վարքը, դրա արդյունք է: Չեմ կարծում, թե պայթյուն կլինի: 1998-ից հետո, երբ ամբիցիաներ ունեցող պաշտոնյաները պայթյուն իրականացրին, իշխանությունները դրանից դաս առան ու այլևս արգելվեց ամբիցիա ունեցող մարդկանց մուտքը իշխանական բուրգի վերնամաս:
