Այսօր լրագրողների հետ զրույցում, անդրադառնալով հարցին, թե «Դաշնակցություն»-ն ընտրություններին ինչ ձևաչափով կմասնակցի, ԱԺ ՀՅԴ խմբակցության ղեկավար Արմեն Ռուստամյանն ասաց, որ ժամանակը դեռ ցույց կտա, բայց իրենք հակված են գնալ առանձին. «Ինչ-որ նոր բան չկա, որ մեզ ստիպի գնալ դաշինքով: Հետագայում կերևա, բայց քանի մի քիչ ժամանակ կա և դեռ հայտնի չէ ընդհանրապես՝ ով է հայտ ներկայացնելու, ինչ ծրագրերով և ովքեր են խաղի մեջ մտնելու, դրա մասին խոսելը վաղ է»:
Ա. Ռուստամյանի խոսքով՝ ՀՀԿ-ի հետ ՀՅԴ-ի համագործակցությունը կապված չէ ո՛չ ընտրությունների հետ, ո՛չ էլ կառավարության ձևավորման գործընթացի հետ. «Մենք այդ համագործակցության մասին հայտարարել ենք՝ նպատակները հռչակելով, և այդ նպատակների շուրջ է, որ մենք համագործակցում ենք: Դա կապված չի որևէ այլ ձևաչափի հետ: Մեր համագործակցության մեջ ժամկետներ չկան: Շատ հստակ արձանագրված է համագործակցության ընդհանուր տրամաբանությունը: Այն հիմնականում վերաբերում է սահմանադրական փոփոխությունները կյանքի կոչելու պրոցեսներին: Սա մեծ գործընթաց է, որ պետք է տեղի ունենա հստակ ժամանակահատվածներում, որոնք արձանագրված են Սահմանադրության անցումային դրույթներում»:
ՀՅԴ խմբակցության ղեկավար Արմեն Ռուստամյանը Գագիկ Ծառուկյանի՝ քաղաքականություն վերադարձն անակնկալ չի համարում. «Քաղաքականության մեջ ամեն ինչ հնարավոր է։ Պարոն Ծառուկյանը երբ ուզում է, կարող է վերադառնալ, ես դա շատ նորմալ եմ համարում: Ովքեր վալերյանկա են խմում, թող իրենք մտածեն՝ ինչու են այդ պատճառով վալերյանկա խմելու։ Դա իրենց գործն է, իսկ մենք փորձ ունենք բոլորի հետ համագործակցելու, այդ թվում՝ Գագիկ Ծառուկյանի»,- նշեց Ա. Ռուստամյանը և ընդգծեց, որ ՀՅԴ-ն Գագիկ Ծառուկյանի վերադարձի հետ կապված պրոբլեմ չի տեսնում:
Նրա խոսքով՝ այն գործիչները, ովքեր ունակ են ազդել քաղաքական պրոցեսների վրա ավելի լավ է քաղաքական դաշտ գան, քան մնան ստվերում։
Հարցին, թե արդյոք Գագիկ Ծառուկյանը կարո՞ղ է վերադառալ առանց Սերժ Սարգսյանի թույլտվության, Արմեն Ռուստամյանը պատասխանեց. «Կարծում եմ՝ մենք պետք է անցած համարենք այն էտապը, երբ որևէ մեկը որևէ տեղ գնալու համար որևէ մեկից պիտի թույլատվություն խնդրի։ Ես սա մեր մեծ ձեռքբերումն եմ համարում։ Ցանկացած քաղաքական գործիչ, ցանկացած քաղաքական ուժ իր անելիքները պետք է ազատորեն ինքնուրույն որոշի: Գագիկ Ծառուկյանն ազատորեն, ինքնուրույն պետք է որոշի իր անելիքը»։
Մանրամասները՝ տեսանյութում:
