Զինվորական ծառայությունը շրջանցելու սողանցքներ չպետք է թողնենք: ԱԺ-ում Զինվորական ծառայություն անցնելու մասին ՀՀ օրենքում փոփոխություններ կատարելու մասին օրենքի նախագծի քննարկման ժամանակ հայտարարեց պատգամավոր Ռուբիկ Հակոբյանը:
Նրա խոսքով՝ եթե խնդիրը սխալ է ձևակերպվում, ապա չի կարող ունենալ ճիշտ լուծում. «Պետք է մեր պետությանը հարիր օրենքներ ստեղծենք, բանակում ծառայելը պետք է արժանապատվության, տղամարդկության հարց լինի: Սա այն պրոբլեմներից մեկն է, որը մենք ենք ստեղծել… Հստակ էր, որ սողանցք ենք ստեղծում, երբ պետության հաշվին մարդը սովորում է, չի ծառայում բանակում, իսկ հետո պիտի աշխատի, կարող է նաև չաշխատել: Մենք բավական ստեղծագործող մարդ ենք, կարող ենք օգտվել այդ ամեն ինչից:
Ըստ նրա՝ գիտությունը պարտվել է, շահել է դոմագոգիան, շահել է սողանցքներ փնտրողների խումբը: Այս հարցը մեկ այլ տեղում էլ կա, երբ դրսում պետական միջոցների հաշվին սովորում են: Տասնյակ մարդիկ սովորում են, ավարտում են, այդ ժամանակ դառնում են այդ երկրի քաղաքացի, բանակում չեն ծառայում ու պետությունը դրանից տուժում է»,- ասաց Ռուբիկ Հակոբյանը:
Ռ. Հակոբյանի խոսքով՝ բանակում ծառայելու պայմանները պետք է հավասար լինեն, դպրոցն ավարտած ցանկացած արական սեռի ներկայացուցիչ պիտի իմանա, որ ծառայելու է: «Պետք է սողանցք չթողնենք, բոլորը պետք է ծառայեն բնակում: Իհարկե, տասնյակ մարդիկ ասում են, որ դա ի վնաս գիտությանն է, բայց հազարավոր մարդիկ էլ ասում են՝ ճիշտ է, որովհետև գիտեն, որ կոռուպցիոն դաշտ է, ինչքան նեղացնում ենք բանակում չծառայողների շրջանակը, այնքան կոռուպցիոն ռիսկն ենք մեծացնում, ո՞վ չգիտի դա: Եկեք այդ հարցը լուծում»:
Մանրամասները՝ տեսանյութում:
