«Թող քար նետի նա, ով անմեղ է: Կաշառք վերցնողին բռնողը կաշառք չի՞ վերցնում. կաշառք վերցնողին բռնողն էլ է կաշառք վերցնում, գործը քննողն էլ է կաշառք վերցնում, դատողն էլ է վերցնում… Նույնն է, թե մարդասպանը մարդասպանին դատի կամ անբարոյականը անբարոյականին դատի: Սա պայքարի ձև չէ»: Այս մասին «Առաջին լրատվական»- ի հետ զրույցում ասաց նախկին դատավոր Պարգև Օհանյանը՝ անդրադառնալով Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի ձերբկալությանը, ով մեղադրվում է 1000 դոլար կաշառք վերցնելու մեջ:
«Շատ վատ արձագանք ունեցավ երույթը, չարախնդողներ չտեսա: Այս երևույթը ոչ մի համակարգի և ոչ մի պետության պատիվ չի բերում: Ոչ միայն ամոթալի, այլ տգեղ երևույթ է: Այլ ձևեր կան կոռուպցիայի դեմ պայքարելու: Շատ դեպքեր են եղել, դատավորը պարզապես դիմում է գրել, դուրս եկել, աղմուկ չի բարձրացել: Մյուս կողմից էլ, բնական է, եթե կա հանցագործություն, պետք է լինի նաև պատիժ»,- նշեց դատավորը:
Նրա խոսքով՝ հազարամյակներով կաշառքը եղել և պահպանվել է: «Այլ հարց է, թե որքանով է էժանագին, «մելչնի» դարձել: Դա էլ լավ օրից չէ: Իհարկե չեմ արդարացնում, բայց մյուս կողմից էլ ինչի՞ ենք մենք հասել այս կերպ պայքարելով: Կաշառք վերցնողին որ բռնեցին, մյուսները զգաստացա՞ն, չեմ կարծում,- նշեց Պ. Օհանյանը և հավելեց, որ կոռուպցիայի դեմ այսպես պայքարելն արդյունավետ չէ, համալիր մոտեցում է պետք ցուցաբերել:
Մանրամասները՝ տեսանյութում:
