Ադրբեջանական APA լրատվական գործակալության փոխանցմամբ, թուրքական BITES ընկերությունը պատրաստվում է Ադրբեջան արտահանել էլեկտրոնային ուսուցողական համակարգեր: Այդ նպատակով ընկերության ներկայացուցիչները հանդիպումներ են անցկացնելու Ադրբեջանի ռազմական կառույցների ներկայացուցիչների հետ:
Այս մասին հայտարարել է թուրքական ընկերության ղեկավար Ուղուր Ջոշքունը:
Վերջինս նշել է. «Ներկայումս մեր ընկերությունը Թուրքիայի զինված ուժերին ապահովում է կոմպյուտերացված ուսուցողական համակարգերով և համապատասխան պատվերներ ունի նաև Մերձավոր Արևելքի երկրներից:
Նախորդ շաբաթ Ստամբուլում կայացած IDEF-2011 խորագրով սպառազինության միջազգային ցուցահանդեսի ժամանակ մենք հանդիպումներ ունեցանք Ադրբեջանի ուժային կառույցների հետ և քննարկեցինք մեր արտադրանքի արտահանման խնդիրը: Ցուցահանդեսի ժամանակ մեր տաղավար այցելեց Ադրբեջանի ռազմական արդյունաբերության նախարար Յավեր Ջամալովը, ուր և նա ականատես եղավ նոր ուսուցողական համակարգին:
Մենք Ադրբեջանին տեսնում ենք բազմաթիվ պոտենցիալ նախագծերի մեջ: Ես կարծում եմ, որ այդ նախագծերում մեր մասնակցությունը կարող է համատեղվել HAVELSAN ընկերության հետ»:
Նշվում է, որ BITES ընկերության այդ ուսուցողական համակարգերի միջոցով կուրսանտները կարող են գիտելիքներ ձեռք բերել` կապված ռազմական տեխնիկայի մանրամասների հետ, այն նաև կրճատում է ուսուցման վրա կատարվող ծախսերը` միաժամանակ հնարավորություն ընձեռելով օգտվել մի քանի անձանց:
Հիշեցնենք, որ երկու օր առաջ նույն աղբյուրը հայտնեց, որ թուրքական HAVELSAN ընկերությունն ադրբեջանական բանակի համար պատրաստել է հրետանային սիմուլյատոր, որը շուտով կուղարկվի Բաքու:
Իսկ առավել վաղ նշվում էր, որ մայիսի 9-13-ը Ստամբուլում տեղի ունեցած սպառազինության միջազգային ցուցահանդեսի ժամանակ Թուրքիան ու Ադրբեջանը կնքել են ռազմական ոլորտին առնչվող երկու պայմանագիր:
Դրանցից մեկով նախատեսվում էր, որ Ադրբեջանը մասնակցելու է Թուրքիայում արտադրվող հետևակային MODERN հրացանների և 105 միլիմետր տրամաչափի հրանոթների համատեղ արտադրությանը, իսկ երկրորդով` կողմերը համատեղ արտադրելու են 120 միլիմետր տրամաչափի ականանետներ:
