Հայաստանում անցկացված ՀԱՊԿ գագաթաժողովի օրակարգում կար նաև այն հարցը, որ մեկ տարի անց Հայաստանի ներկայացուցիչը պետք է զբաղեցնի ՀԱՊԿ գլխավոր քարտուղարի պաշտոնը, բայց օրակարգից դուրս հանվեց, ինչը փորձագետները պատահական չեն համարում: Թեմայի շուրջ «Առաջին լրատվական»- ը զրուցեց ԱԺ արտաքին հարաբերությունների մշտական հանձնաժողովի նախագահ Արտակ Զաքարյանի հետ:
Անդրադառնալով հարցին, թե այս անգամ ինչո՞ւ հետաձգվեց Հայաստանի ներկայացուցչի նշանակումն այս պաշտոնում, արդյոք որևէ միտում կար, Արտակ Զաքարյանը պատասխանեց, որ իր կարծիքով միտում չկար. «Առանց խորանալու դետալների մեջ ուղղակի արձանագրենք, որ խնդրի քննարկումն օրակարգից տեղափոխվեց հաջորդ օրակարգ, առանց փոփոխելու այն սկզբունքը, որ Հայաստանն է ստանում հաջորդ իրավունքը ՀԱՊԿ գլխավոր քարտուղարի պաշտոնում ներկայացնելու իր թեկնածուին»:
Ա. Զաքարյանը նշեց, որ ՀԱՊԿ-ի կոլեկտիվ անվտանգության խորհրդի հայաստանյան նստաշրջանում քննարկված հարցերն իրենց կարևորությամբ նշանակալից էին և նաև ունեին այս ժամանակահատվածի համար ինչպես տարածաշրջանային, այնպես էլ գլոբալ անվտանգության խնդիրներ ներառող օրակարգ: Նրա խոսքով՝ անվտանգության հայեցակարգը, որը ընդունվեց, և այն համաձայնագրերը, որոնք ստորագրվեցին, դրանք տվյալ ՀԱՊԿ անդամ պետությունների կողմից բազմակողմ ձևաչափում կարևորվող համաձայնագրեր էին, որոնք ամենատարբեր ոլորտներում ներկայացնելու են համագործակցության այս կամ այն խնդիրները՝ զարգացնելով ՀԱՊԿ ներքին կապերը:
«ՀԱՊԿ-ը, որպես ռազմաքաղաքական կառույց, փորձում է նաև իր դերակատարությունը և ազդեցության կարողությունները մեծացնել աշխարհում, մենք շահագրգիռ ենք ՀԱՊԿ-ի շրջանակներում մեր գործունեությանը այնքանով, որ ՀԱՊԿ-ը մեզ համար ուղիղ հնարավորություն է հայ-ռուսական քաղաքական և ռազմատեխնիկական համագործակցության, միաժամանակ մենք շարունակում ենք և շարունակելու ենք մեր բազմավեկտոր քաղաքականությունը՝ զարգացնելով նաև մեր հարաբերությունները, համագործակցությունը մեր մյուս գործընկերների՝ միջազգային կազմակերպությունների՝ այդ թվում նաև ՆԱՏՕ-ի, և պետությունների հետ:
Բազմավեկտոր ճանապարհը շարունակում է մնալ միակ ճիշտ ճանապարհը, որպեսզի, ունենալով ղարաբաղաադրբեջանական հակամարտություն, ունենալով փակ սահմաններ և տարբեր մարտահրավերներ տարածաշրջանում, կարողանանք պահպանել անվտանգ և կայուն զարգացման միջավայրը Հայաստանում, հատկապես խաղաղության ձևաչափով»,- նշեց Ա. Զաքարյանը:
Մանրամասները՝ տեսանյութում:
