ԱՄՆ նախագահ Բարաք Օբամայի վարչակազմը Քիմիական զենքի արգելման կազմակերպությունում (ՔԶԱԿ) տարածել է բանաձևի նախագիծ, որով Սիրիային պարտադրվում է ազատվել քլորի պաշարներից՝ նյութ, որը լայնորեն օգտագործվում է որպես արդյունաբերական մաքրող միջոց: Այս մասին հայտնում է Foreign Policy-ն:
Պարբերականի տեղեկատվությամբ՝ ԱՄՆ-ին այդպիսի միջոցի է մղել Սիրիայում քիմիական զենքի կիրառման մասին ՔԶԱԿ-ի զեկույցը: Ըստ զեկույցի՝ հետաքննված դեպքերից երկուսում քիմիական զենքի կիրառման պատասխանատվությունն ընկած է Սիրիայի կառավարության վրա:
Բանաձևի համաձայն՝ Սիրիային նաև կպարտադրվի 30 օրվա ընթացքում հայտնել մի շարք թունավոր քիմիական նյութերի ունեցած պաշարների մասին: Բանաձևի ընդունման դեպքում կպահանջվի նաև տեղեկատվություն սիրիական զենքի պաշարների մասին, որոնցում կարող է օգտագործվել քլոր:
Ըստ բանաձևի տեքստի՝ Սիրիան նաև պետք է զրկվի ՔԶԱԿ-ում ձայնի իրավունքից, երկրի ներկայացուցիչները չեն կարողանա կազմակերպությունում զբաղեցնել բարձր պաշտոններ, ինչպես նաև աշխատել կազմակերպության շտաբ-բնակարանում: Ինչպես նշում է պարբերականը՝ այդ դեպքում ՔԶԱԿ-ում Սիրիան կլինի դիտորդի կարգավիճակում:
Պարբերականի տեղեկատվությամբ՝ նախաձեռնությանն արդեն աջակցել են Մեծ Բրիտանիան, Գերմանիան, Ֆրանսիան և մի շարք այլ երկրներ:
