2015 թվից հետո ամերիկյան հակահրթիռային համակարգը, որը տեղադրվելու է Արևելյան Եվրոպայում, ի վիճակի կլինի ոչնչացնել ռուսական միջմայրցամաքային բալիստիկ հրթիռները: Այս մասին այսօր հայտարարել է ՌԴ ՊՆ գլխավոր շտաբի պետի տեղակալ Անդրեյ Տրետյակը: Գեներալ-լեյտենանտն այս եզրահանգման է եկել այն բանից հետո, երբ պաշտպանության նախարարության գիտահետազոտական կազմակերպությունն իրականացրել է համապատասխան ուսումնասիրություններ` վերլուծելով ամերիկյան հակահրթիռային համակարգի տեղադրման հնարավորությունները Եվրոպայում:
Գլխավոր շտաբի պետ Նիկոլ Մակարովը, որը նույնպես ներկա է եղել այդ ասուլիսին, ասել է, որ չի հավատում այն հայտարարություններին, թե «Ռուսաստանը չպետք է վախենա Եվրոպայում ՀՀՀ-ի տեղադրումից»: Մակարովն ասել է, որ եթե այս խնդիրը չլուծվի, ապա կհանգեցնի սպառազինությունների նոր մրցավազքի: Այս խնդրի շուրջ մայիսի 18-ին մամուլի ասուլիսի ժամանակ կրկին խոսել էր Դմիտրի Մեդվեդևը` կոչ անելով ստեղծել Եվրոպայում նոր համատեղ հակահրթիռային համակարգ:
Գեներալ Տրետյակի կարծիքով, մինչև 2015 թ. ԱՄՆ-ն կվերամշակի իր «Ստանդարտ 3» հակահրթիռային համակարգը: Եթե սրան էլ գումարվի այն, որ այդ համակարգը տեղադրվելու է Լեհաստանում` Ռուսաստանի սահմանի անմիջական մերձակայքում, ապա «մեծ հավանականություն է առաջանում, որ ռուսական միջմայրցամաքային բալիստիկ հրթիռները և սուզանավերից բաց թողնված հրթիռները կոչնչացվեն»: