Ղազախստանի նախագահի պաշտոնական կայքում հաղորդագրություն է հրապարակվել, որ Նուրսուլթան Նազարբաևը այժմ «բուժվում է մրսածությունից», տեղեկացնում է Rueters-ը:
Ղազախստանի համար նախագահի առողջության մասին տեղեկատվության հրապարակումը հազվադեպ երևույթ է, քանի որ նախագահի առողջական վիճակը պետական գաղտնիք է համարվում:
Rueters-ը նշում է, որ ղազախստանցի վերլուծաբանների կարծիքով՝ նախագահի հիվանդությունը պատրվակ է՝ խուսափելու հայաստանյան այցից: Հայաստանի նախագահ Սերժ Սարգսյանի հրավերով հոկտեմբերի 13-ին նախատեսված է Նազարբաևի այցը Երևան: Առայժմ տեղեկատվություն չկա այցը չեղյալ հայտարարելու մասին:
Երևանի և Աստանայի հարաբերություններում լարվածություն առաջացավ այս տարվա ապրիլին, երբ Լեռնային Ղարաբաղում վերսկսված ռազմական գործողություններից հետո Ղազախստանի պնդմամբ Երևանում նախատեսված Եվրասիական տնտեսական միության բարձր մակարդակի հանդիպումը տեղափոխվեց Մոսկվա:
Նազարբաևի հիվանդության պատճառով կասկածի տակ է հայտնվել նաև նրա այցը Ադրբեջան, որը նախատեսված էր հոկտեմբերի 12-ին: Ղազախստանի նախագահի աշխատակազմից ադրբեջանական Trend գործակալությանը փոխանցել են, որ Ադրբեջան կատարելիք այցը կախված է Նազարբաևի առողջական վիճակից:
