Ֆրանսիայի արտաքին գործերի նախարար Ժան Մարկ Էյրոն հայտարարել է, որ Փարիզը կդիմի Միջազգային քրեական դատարան Սիրիայում կատարված հնարավոր պատերազմական հանցագործությունները հետաքննելու շուրջ խորհրդակցություններ անցկացնելու համար։
«Ֆրանսիան մտադիր է կապվել դատարանի գլխավոր դատախազի հետ՝ իմանալու, թե ինչ ձևով կարող է հետաքննությունն սկսվել»,- ասել է արտաքին քաղաքական գերատեսչության ղեկավարը՝ ելույթ ունենալով France Inter ռադիոկայանի եթերում:
Հոկտեմբերի 9-ին Ֆրանսիայի նախագահ Ֆրանսուա Օլանդը հայտարարել էր, որ Սիրիայի Հալեպ քաղաքի բնակիչները դարձել են պատերազմական հանցագործությունների զոհեր, նշելով, որ դրանք կատարողները կենթարկվեն պատասխանատվության, այդ թվում՝ Միջազգային քրեական դատարանի առջև։
