Հավաքական անվտանգության պայմանագրի կազմակերպությունը ծրագրում է 2017 թվականի հոկտեմբերին հավաքական ուժերի «Մարտական եղբայրություն» ընդգրկուն վարժանքներ անցկացնել երեք երկրների՝ Հայաստանի, Ղազախստանի և Ռուսաստանի տարածքում: Այս մասին TASS գործակալությանը տված հարցազրույցում հայտնել է ՀԱՊԿ-ի միացյալ շտաբի պետ գեներալ-գնդապետ Անատոլի Սիդորովը:
«Այս տարի ՀԱՊԿ-ի չորս վարժանքներ են անցկացվել տարբեր պետությունների տարածքում և տարբեր ժամանակ: Հաջորդ տարի մենք ծրագրում ենք միավորել զորավարժությունները և դրանք միասնական մտահղացմամբ միաժամանակ անցկացնել ՀԱՊԿ-ի հավաքական ուժերի բոլոր բաղադրիչների մասնակցությամբ: Առայժմ առաջարկված Է «Մարտական եղբայրություն» անվանումը»,-նշել է Սիդորովը:
Գործակալության զրուցակցի խոսքով՝ ՀԱՊԿ-ի միասնական վարժանքները տեղի կունենան 2017 թվականի հոկտեմբերին: «Այսինքն, մենք առանձին զորավարժություններ չենք անցկացնելու ապրիլին, օգոստոսին, սեպտեմբերին ու հոկտեմբերին, ինչպես որ այս տարի Էր, այլ 2017 թվականի հոկտեմբերին սեղմ ժամկետում համատեղ գործողություններ կմշակենք երեք պետությունների՝ Հայաստանի, Ղազախստանի և Ռուսաստանի տարածքում: Դա ավելի արդյունավետ կլինի ՀԱՊԿ-ի հավաքական ուժերի կառավարման միասնական համակարգի օպտիմալացման համար»,-ասել Է նա:
«Ենթադրաբար, վարժանքների տևողությունը կկազմի երեք շաբաթ, հակաահաբեկչական գործողությունը կմշակվի միասնական մտահղացմամբ՝ նախ հետախուզում, այնուհետև օդուժի աջակցությամբ օպերատիվ արձագանքման հավաքական ուժերի կիրառում, ապա հետհակամարտային կարգավորում՝ խաղաղապահ ուժերի կիրառմամբ: Դա կլինի էքսպերիմենտ»,-հավելել է գեներալ-գնդապետը:
ՀԱՊԿ-ի օպերատիվ արձագանքման հավաքական ուժերը ներառում են Հայաստանի, Բելառուսի, Ղազախստանի, Ղրղզստանի, Ռուսաստանի և Տաջիկստանի ավելի քան 17 հազար զինծառայողներ: Դրանք թույլ են տալիս համարժեք արձագանքել գոյություն ունեցող բոլոր մարտահրավերներին ու սպառնալիքներին՝ ահաբեկչությանը, ծայրահեղականությանը, թմրաթրաֆիկին հակազդելուն:
ՀԱՊԿ-ի խաղաղապահ ուժերում ընդգրկված է մոտավորապես 3600 մարդ:
