Ազգային ժողովի «Բարգավաճ Հայաստան» խմբակցության պատգամավոր Լյովա Խաչատրյանն անդրադարձել է ԲՀԿ հիմնադիր Գագիկ Ծառուկյանի՝ քաղաքականություն վերադառնալու մասին խոսակցություններին: Ազգային ժողովում խորհրդարանական ճեպազրույցների շրջանակներում լրագրողների հետ հանդիպմանը Լյովա Խաչատրյանն ընդգծեց, որ այդ հարցով պետք է դիմել անձամբ Գագիկ Ծառուկյանին, քանի որ դա նրա որոշելու հարցն է:
«Ինձ համար անհասկանալի է, որ մամուլում այդքան շատ քննարկման առարկա են դառնում կուսակցության ներկայացուցիչների հանդիպումները Գագիկ Ծառուկյանի հետ: Նա մեր կուսակցության հիմնադիրն է, կուսակցությունում շատերը շարունակում են նրա հետ շփումները, հանդիպումները, ոմանք էլ նրա հետ ընկերական հարաբերությունների մեջ են: Ես չեմ հասկանում, թե ինչու են այդ հանդիպումներն այդքան քննարկման առարկա դառնում»,- նշեց Խաչատրյանը:
Հարցին՝ առաջիկա խորհրդարանական ընտրություններում ԲՀԿ-ն առանց Գագիկ Ծառուկյանի կկարողանա՞ հաղթահարել անհրաժեշտ շեմը, Լյովա Խաչատրյանն ասաց. «Տեղական ինքնակառավարման մարմինների ընտրությունները ցույց տվեցին, որ մեր թիմը մարտունակ է: Իհարկե, առանց Գագիկ Ծառուկյանի մասնակցության տարբերություն կա և դա զգալի է, սակայն Գյումրիում մեր գրանցած արդյունքը ցույց տվեց, որ մենք մարտունակ թիմ ունենք և կարող ենք հաջողություն արձանագրել»:
Մարամասները՝ տեսանյութում: