Գերմանիայի և Ֆրանսիայի իշխանությունները ֆրանսիական տարածքում գերմանական ռազմական ինքնաթիռներ տեղակայելու մասին համաձայնագիր են ստորագրել՝ Երկրորդ համաշխարհային պատերազմի ժամանակից ի վեր առաջին անգամ: Դա հնարավոր է դարձել ԵՄ-ից դուրս գալու Մեծ Բրիտանիայի որոշումից հետո՝ գրում է The Times թերթը:
Խոսքը գերմանական C-130J Super Hercules ռազմական-տրանսպորտային ինքնաթիռների մասին է, որոնք մինչև 2021թ. կտեղակայվեն Օռլեանում նոր համատեղ բազայում: Համաձայնագիրը ստորագրել են Ֆրանսիայի պաշտպանության նախարար Ժան-Իվ Լե Դրիանը և նրա գործընկեր Ուրսուլա ֆոն դեր Լյայենը: «Մենք համոզված ենք, որ գերմանա-ֆրանսիական համագործակցությունը եվրոպական միասնության միջուկն է, եվրոպական համագործակցության շարժիչը»,- Ժան-Իվ Լե Դրիանի խոսքերն է մեջբերում DPA գործակալությունը:
The Times-ի տեղեկությամբ՝ ավելի վաղ Գերմանիայի պաշտպանության նախարար Ուրսուլա ֆոն դեր Լյայենը հայտարարել է, որ Մեծ Բրիտանիան պարբերաբար արգելափակել է ԵՄ շրջանակներում ռազմական համագործակցության ուժեղացման նախագծերը: Ըստ գերատեսչության ղեկավարի՝ ռազմական առումով ԵՄ-ից Միացյալ Թագավորության դուրս գալը միայն դրական դեր կխաղա միության երկրների համար:
