Աշխարհազորի 20 մարտիկներ սպանվել են միջազգային կոալիցիայի կողմից սխալմամբ հասցված ավիահարվածի հետևանքով։ Դեպքը տեղի է ունեցել իրաքյան Էլ-Կիյարա քաղաքի մոտ։ Այս մասին հայտնում է Al Jazeera-ն։
Հարվածը սխալմամբ հասցվել է Հարաիբ-Ջաբար բնակավայրում աշխարհազորի ջոկատներից մեկի շտաբին։
Ինչպես նշել է դաշտային հրամանատարներից մեկը՝ հարձակումը կատարվել է այն ժամանակ, երբ աշխարհազորայինները իրաքյան բանակի ջոկատների հետ դիմակայել են ԴԱԻՇ-ի գրոհայինների հարձակումներին։ Հրամանատարի խոսքով՝ աշխարհազորի դիրքերը հայտնի են եղել այդ շրջանի իրաքյան ռազմական կառույցներին, իսկ նրանց բոլոր գործողությունները համակարգվում են կոալիցիայի հետ։
Միջազգային կոալիցիայի հրամանատարությունից այդ առնչությամբ մեկնաբանություններ չեն ստացվել։
