ԱՄՆ նախագահի թեկնածու, միլիարդատեր Դոնալդ Թրամփի խաղատան հարկային պարտքը Նյու Ջերսի նահանգում 30 մլն դոլարից կրճատվել է մինչև 5 մլն դոլար: Դա տեղի է ունեցել ընդամենը մեկ տարում՝ մագնատի ներկայիս կողմնակից Քրիս Քրիստիի՝ այդ նահանգի ղեկավար ընտրվելուց հետո: Այս մասին հայտնում է The New York Times-ը:
Հաղորդվում է, որ Նյու Ջերսիի իշխանությունները 6 տարի փորձել են դատարանի միջոցով հասնել նրան, որ Թրամփի խաղատունը վճարի 30 մլն դոլար չվճարված հարկերը: Երբ Քրիստին 2010թ. դարձել է նահանգապետ, երկարատև դատավարությունը կասկածելիորեն արագ ավարտվել է: 2011թ. դեկտեմբերին Նյու Ջերսիի իշխանությունները համաձայնել են նվազեցնել պահանջների շեմը մինչև նախնական գումարի 1/6 մաս:
The New York Times-ը, հղում անելով իրավաբաններին, գրում է, որ այս դեպքում Քրիստին բարեխոսել է Թրամփի համար: Նրանք ծանոթացել են 2002թ., երբ առաջինը զբաղեցրել է Նյու Ջերսիի գլխավոր դատախազի պաշտոնը: 2005թ. Թրամփը Քրիստիին հրավիրել է իր (3-րդ) հարսանիքին, իսկ նա մագնատին 2010թ. հրավիրել է իր երդման արարողությանը որպես նահանգապետ:
Քրիստին Թրամփի մրցակիցներից է եղել Հանրապետական կուսակցությունից ԱՄՆ նախագահի թեկնածու առաջադրվելու համար պայքարում: Նյու Հեմփշիր նահանգում նախնական ընտրություններում անհաջողությունից հետո նա հայտարարել է պայքարը դադարեցնելու մասին: Ավելի ուշ նա պաշտոնապես աջակցել է Թրամփին նախագահական պայքարում և հիմա նրա առավել վստահելի մարդկանց թվում է:
