Բոլորովին վերջերս մեկ թռիչքը դեպի տիեզերք արժեր 20-35 միլիոն դոլար: Այժմ Ռիչարդ Բրենսոնի շնորհիվ տիեզերական զբոսաշրջությունը ավելի հասանելի է դարձել:
Ընդ որում, ի տարբերություն շատ այլ ծրագրերի, Virgin Galactic ընկերությունը չի օգտագործում սովետական տիեզերագնացության հարուստ փորձը, այլ ինքնուրույն է ստեղծում սեփական ենթակառույցները, տիեզերակայաններն ու նավերը: «Ամերիկա» տիեզերակայանը անցած տարի է բացվել: Այն տեղակայված է Նյու Մեքսիկո անապատում: Դրա շինարարության մեջ 209 միլիոն եվրո է ներդրվել, ընդ որում՝ ծրագիրը ֆինանսավորել են Բրենսոնը և Նյու Մեքսիկոյի իշխանությունները:
Տիեզերակայանի շենքի վրա աշխատել են բրիտանական Foster + Partners ճարտարապետական ընկերությունը, ինչպես նաև ամերիկյան URS Corporation-ը և SMPC Architects ընկերությունները: Կառույցի դիզայնը այնպես է հաշվարկված, որպեսզի այն պաշտպանված լինի անապատի խիստ կլիմայից, իսկ ներսում ապահովված լինի լավ օդափոխությամբ: Լույսի բազմաթիվ անցքերը շենքի ներսը ապահովում են բնական լույսով, իսկ հայելապատ պատերը ուղևորների և հյուրերի վրա մեծ տպավորություն են թողնում: 11 հազար քմ տարածք ունեցող տիեզերակայանը կարող է տեղավորել WhiteKnightTwo և SpaceShipTwo տիեզերանավերը:
Այս երկու տիեզերանավերը արդեն փորձարկվել են և կարող են ընդունել առաջին զբոսաշրջիկներին: Այս պահին արդեն տոմս է պատվիրել 600 մարդ, որոնց թվում են հայտնի գործարարներ և շոու-բիզնեսի աստղեր: Տոմսերի գինը 250 հազար դոլար է: Այն ներառում է ոչ միայն թռիչքի ծախսերը, այլև թեստավորումն ու ապագա տիեզերագնացների ֆիզիկական և հոգեկան բուժզննումը: Նախապատրաստական աշխատանքները տևում են 3 օր, որոնք օգնում են կանխարգելել թռիչքի ժամանակ ծագող դժբախտ պատահարները: Ընդ որում, թռիչքի թույլտվություն է ստացել դիմողների 88.93%-ը. ամենատարեց զբոսաշրջիկը 88 տարեկան է:
