Մինչ ԱՄՆ Դեմոկրատական կուսակցության որոշ ներկայացուցիչներ քննադատում են Ռուսաստանի հետ ընդհանուր լեզու գտնելու նախագահի հանրապետական թեկնածու Դոնալդ Թրամփի ցանկությունը, նրանց կուսակիցները գործող նախագահի վարչակազմում ձգտում են Մոսկվայի հետ երկխոսություն հարթել: Այս մասին գրում է Politico-ն:
Հիլարի Քլինթոնի կողմնակիցները հակառուսական հռետորություն են օգտագործում՝ որպես բացասական կերպար ներկայացնելու Դոնալդ Թրամփին, որը բազմիցս հավանության խոսքեր է թույլ տվել իրեն Կրեմլի հասցեին: Դեմոկրատների ճամբարում պարբերաբար հիշեցնում են «Մոսկվայի կողմից սպառնալիքի և ՆԱՏՕ-ի արևելյան թևն ամրապնդելու անհրաժեշտության մասին», նշում է հոդվածի հեղինակը:
Միաժամանակ դեմոկրատները Սպիտակ տանն ակնհայտորեն այլ հայացքներ ունեն Մոսկվայի և Վաշինգտոնի հարաբերությունների հարցում: Բացի նրանից, որ ԱՄՆ պետքարտուղար Ջոն Քերին վերջերս ակտիվորեն բանակցում է Սիրիայի հարցով Ռուսաստանի հետ համագործակցությունն ամրապնդելու ուղղությամբ՝ Օբամայի վարչակազմում անցած շաբաթ հիշեցրել են, որ Մոսկվայի հետ հարաբերությունների հաստատումը Վաշինգտոնի արտաքին քաղաքականության կենտրոնական առաջադրանքն է, նշում է պարբերականը:
Ազգային անվտանգության ծառայությունների աշխատակիցները դեմոկրատներից մտավախություններ են հայտնում Մոսկվայի նկատմամբ թշնամական հռետորության ուժեղացման պատճառով, որը բարդացնում է գլոբալ խնդիրների լուծումը և մեծացնում է հակամարտության ռիսկերը:
«Նույնիսկ եթե մեր դիրքորոշումները տարբեր են, մենք նախկինի պես պետք է երկխոսություն վարենք: Կարծում եմ՝ հիմա մենք գնում ենք դա տեսադաշտից բաց թողնելու ռիսկին»,- նշում է Զինված ուժերի հարցերով կոմիտեի նախկին նախագահ Սեմ Նաննը:
Ու թեև նախընտրական արտահայտությունները քաղաքականության իրական արտացոլումը չեն, դրանք կարող են ամերիկյան հասարակությանը տրամադրել Ռուսաստանի դեմ, գրում է հոդվածի հեղինակը:
