«Ակնհայտ է, որ իշխանությունները չեն ուզում, որ արյուն լինի, քանի որ մեկ անգամ արյան հրաման տվել են և մինչև հիմա շատ ծանր կացության մեջ են ընկել։ Այդ հրաման տվողները արդեն տասը տարի է փորձում են մտնել քաղաքականություն, բայց ժողովուրդը նրանց չի ներում»,- «Առաջին լրատվական»-ի հետ զրույցում անդրադառնալով այս օրերի դեպքերին ասաց հրապարակախոս Արծրուն Պեպանյանը։ Նրա խոսքերով՝ իշխանությունը նախընտրել է առանց զոհերի տարբերակը՝ գիտակցելով դրա միջազգային հետևանքները, դրա համար գնում է զինված խմբի անդամներին վիրովորելու եղանակով չեզոքացնելուն։ «Մյուս կողմից մեր ժողովրդի մեջ կա արյան գին հասկացությունը, երբ իշխանությունը քաղաքական նպատակով մարդ է սպանում։ Տարիներ շարունակ ժողովրդի մեջ պահպանվում է այդ անհանդուրժողական վերաբերմունքը»,- նկատեց Պեպանյանը։
Անդրադառնալով հարցին, թե ինչի կհանգեցնի այս վիճակը, բանակցությունների ձախողման պարագայում, նկատեց, որ պահանջները բավական բարդ էին և ենթադրվում էր, որ իշխանությունները չէին գնալու դրանց կատարմանը։ Պետք էր փոխզիջումային տարբերակներ գտնել, բայց դրան էլ դեմ արտահայտվեց զինված խումբը՝ պնդելով, որ իրենց գերնպատակը իշխանությունների հրաժարականն է։ «Շատ բարդ խնդիր էր ներկայացված, գրեթե անիրականանալի։ Դրա համար պետք էր գնալ փոխզիջումների՝ հանելով գլխավոր պահանջը, իսկ տղաների կյանքը պահպանվում էր։ Բայց, ցավոք, դա տեղի չունեցավ»,- ասաց Պեպանյանը։
Մեր զրուցակցի խոսքերով՝ տղաները չպետք է գնային այդ քայլին, իսկ գնալուց առաջ նախ պետք էր կազմել ուժային բալանս, որը ցույց կտար, որ իրենք չէին կարող հեղեղի պես գալ և քշել տանել իշխանությանը։ Պեպանյանի խոսքերով հիմա չկա հասարակության այն զանգվածը, որի ընդվզումը, բողոքի ալիքը կարող էր իրական պահանջ թելադրել իշխանություններին։ «Ես իրականում հասկանում եմ զինյալ տղաներին։ Իրականությունն այնպիսինն է, որ չընդվզելն ամոթ է, բայց մյուս կողմից էլ պետք էր հաշվարկել, թե իրենց քայլերը ինչ հետևանք կառաջացնեին և արդյոք անհրաժեշտ կրիտիկական զանգված դուրս կգար փողոց։ Ցավոք սրտի դա չհաջողվեց և մինչ օրս էլ չի հաջողվում այդ կրիտիկական զանգվածը դուրս բերել փողոց»,-նկատեց հրապարակախոսը։
Առավել մանրամասն՝ տեսանյութում։
