Ազատ գետին սպառնացող նոր վտանգը գետի ափամերձ գոտում ապրող գառնեցիների միտքը հանգիստ չի թողնում։
Գառնեցի տիկնոջ գրկի փոքրիկը ծնվել է վարչապետ Հովիկ Աբրահամյանի՝ Գառնի գյուղ այցելելու օրը։ Ի պատիվ Ազատ գետի ազատության՝ նրան որոշել են Ազատ կոչել։
Քաղցրաշենի ոռոգման համակարգի կառուցումը չեղարկելու մասին վարչապետ Հովիկ Աբրահամյանի արած բանավոր հայտարարությունը, սակայն, այդպես էլ չի իրագործվում։ Ջրպետկոմի մասնագետներն այս կողմերում նոր չափումներ են սկսել։
Նոր՝ «Փոխզիջումային» անունով կնքված ծրագրով Քաղցրաշենի ինքնահոս ոռոգման համակարգի նախատեսված գլխամասային հանգույցը տեղափոխվել է Ազատ գետի հունով 5.2 կմ ներքև՝ դեպի ներկայում գործող Հացավանի և Գեղադիրի պոմպակայանի տարածք։ Գառնեցիները նոր ծրագիրը թիկունքից հարված են համարում։ Նրանք փոխզիջմանը դեմ են։
Ազատի կիրճի ու Խոսրովի արգելոցի գեղատեսիլ բնությունը կանապատանա, էկոհամակարգն անդառնալի վնաս կկրի, եթե Ազատ գետից անգամ մեկ կաթիլ ջուր պակասի։
Ազատի կիրճն առատ է ոչ միայն Կարմիր գրքում գրանցված կենդանիներով, այլ նաև բույսերով։ Տեղի բնակիչները կիրճը վտանգից պաշտպանելու նվիրյալներն են։ Ամեն ծառի, ամեն թփի համար պատասխանատվություն են ստանձնել ոչ թե օրենքի, այլ սեփական խղճի առաջ։
Առանց գետի կիրճը կմահանա, ասում են, որ գետի ջուրը նաև բուժիչ նշանակություն ունի։ Ազատի կիրճը սպանելու փոխարեն տեղացիներն առաջարկում են այն Հայաստանի զբոսաշրջային վայրերից մեկը դարձնել։
Մանրամասները՝ տեսանյութում:
Լուսանկարը՝ Photolure-ի