Juno զոնդը Երկիր է փոխանցել յուրահատուկ տեսանյութ, որում երևում է, թե ինչպես են արբանյակները պտտվում Յուպիտերի շուրջը և ամբողջական պտույտ կատարում մոլորակի շուրջը, ինչպես նաև սկսել է պատրաստվել առաջին գիտական տվյալների հավաքմանը, որոնք Երկիր կփոխանցվեն օգոստոսի վերջին: RIA Novosti-ի հաղորդմամբ՝ այս մասին հայտարարել են առաքելության մասնակիցները NASA-ի Ռեակտիվ շարժման լաբորատորիայում մամլո ճեպազրույցի ժամանակ:
«Juno-ի տեսախցիկն առանձնահատուկ է: Այն կարող է ստանալ որակով և տեսքով նույնպիսի լուսանկարներ և տեսանյութեր, ինչպես եթե դուք նստած լինեիք զոնդի մեջ և տեսանկարահանեիք Յուպիտերը ձեր iPhone-ով կամ այլ սմարթֆոնով»,- նշում է Բոուլդերում (ԱՄՆ) Հարավարևմտյան հետազոտական ինստիտուտից առաքելության ղեկավար Սքոթ Բոլթոնը:
Առաքելության գիտական ղեկավար Սթիվ Լևինի խոսքով՝ առաջին գիտական տվյալները կստացվեն օգոստոսի 27-ից ոչ շուտ, երբ գիտնականները կմիացնեն և նորից կստուգեն Juno-ի բոլոր գործիքները, որոնք անջատվել են Յուպիտերին մոտենալու ընթացքում:
Զոնդի հիմնական խնդիրը մոլորակի քիմիական բաղադրության ուսումնասիրումն է, մասնավորապես՝ սարքը կգնահատի թթվածնի և ջրի քանակը, ինչը հնարավորություն կտա նեղացնել գազային հսկայի ձևավորման գործընթացի մասին վարկածների շրջանակը: NASA-ի ընթացիկ հաշվարկներով՝ Juno-ն կկատարի առնվազն 37 շրջապտույտ, որոնց ընթացքում զոնդը կուսումնասիրի Յուպիտերի ամպերը, կիմանա՝ ինչ է թաքնված դրանց հետևում և «կշոշափի» դրա մագնիսական դաշտը:
