Սարգսյան-Ալիև հաջորդ հանդիպման վայրի ու ժամկետի մասին տեղեկությունը պետք է տրամադրեն կողմներն անձամբ։ Այս մասին այսօր «Առաջին լրատվական»-ի հետ զրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան։
Ի պատասխան ԼՂ հարցում Ռուսաստանի զբաղեցրած դիրքորոշման մասին հարցին՝ Զախարովան ասել է. «Ռուսաստանը զբաղեցնում է դիրքորոշում՝ ուղղված մեկ բանի՝ այդ հակամարտության շուտափույթ, արագ կարգավորմանը, որը ոչ միայն ձգձգվել է, այլև պահանջում է իր լուծումը։ Մենք դրա համար կանենք հնարավոր ամեն բան»։
Նրա խոսքով՝ ՌԴ նախագահ Վլադիմիր Պուտինը և արտաքին քաղաքական գերատեսչությունը ակտիվ ջանքեր են ներդրում՝ երկկողմ, բազմակողմ ուղիներով, ԵԱՀԿ Մինսկի խմբի շրջանակում, քանի որ «ձգձգման յուրաքանչյուրը օր սպառնալիք է պարունակում տեղի բնակիչների համար»։
«Պետերբուրգյան հանդիպումից առաջ բոլորը մտավախություն էին հայտնում, որ Ռուսաստանը ստանձնում է կարգավորման գործընթացի մենաշնորհը, չի ցանկանում դրան մասնակից դարձնել Մինսկի խմբին, բայց ինչպես ցույց տվեց հանդիպումը, բոլոր համանախագահներն իրազեկվել են հանդիպման մասին»,- ասել է նա։
Զախարովայի խոսքով՝ իրենք հիանալի հասկանում են ԵԱՀԿ ՄԽ նշանակությունը, աշխատաոճը, ձևաչափը, այդ իսկ պատճառով հարգանքով են վերաբերվում: «Պետերբուրգի հանդիպումը նորարարություն չէր»,- ասել է նա՝ ընդգծելով, որ այն կողմերի միջև շփման մի ձև է։
