Ռուսաստանում ԱՄՆ նախկին դեսպան Մայքլ Մաքֆոլը պարզաբանել է, թե իր կարծիքով՝ ինչու է ԵՄ-ից Մեծ Բրիտանիայի դուրս գալը ձեռնտու Մոսկվային:
«Ամենակարևորը, որ ԵՄ-ում Եվրոպայում ռուսական ագրեսիայի ամենասկզբունքային քննադատներից մեկը Բրյուսելում այլևս ձայնի իրավունք չի ունենա: Դա լավ է Պուտինի շահերի և վատ՝ ԱՄՆ ազգային շահերի համար»,- մեջբերում է Մաքֆոլի խոսքերը Washington Post-ը:
Մաքֆոլի խոսքով՝ այժմ Եվրոպային փորձություն է սպասվում. կկարողանա՞ նա պահպանել Ռուսաստանի նկատմամբ պատժամիջոցները: Այն երկրները, որոնք ձգտում են Ռուսաստանի հետ համագործակցության, կամրապնդեն իրենց դիրքերը, իսկ այդպիսի համագործակցության թշնամիները (օրինակ՝ Մերձբալթիկան) կդառնան ավելի թույլ: Բացի այդ՝ Brexit-ի պատճառով կթուլանա Ուկրաինայում «Պուտինի հակառակորդների» դիրքորոշումը:
Ռուսաստանում ԱՄՆ նախկին դեսպանը գրել է, որ Պուտինը չէ Brexit-ի պատճառը, սակայն նախագահի արտաքին քաղաքականությունը և առաջադրված նպատակները մեծ օգուտներ կստանան հանրաքվեի արդյունքներից՝ հայտնում է Regnum-ը:
Միաժամանակ Մաքֆոլը ընդգծել է, որ քանի դեռ Եվրոպան թուլանում է, Ռուսաստանը, նրա դաշնակիցները և տարբեր կազմակերպություններ միավորվում են և ընդունում նոր անդամներ:
