Անհրաժեշտ է պատասխան գտնել ներկայիս միգրացիոն ճգնաժամին՝ պահպանելով մարդու իրավունքները, այդ թվում՝ «ԵՄ-ի և Թուրքիայի միջև համաձայնագրի կոնտեքստում»: TASS-ի հաղորդմամբ՝ այսպիսի տեսակետ է հայտնել ՄԱԿ-ի մարդու իրավունքների հարցերով գերագույն հանձնակատար Զեյդ Ռաադ ալ-Հուսեյնը:
Ժնևում ՄԱԿ-ի Մարդու իրավունքների հարցերով խորհրդի 32-րդ նստաշրջանում ելույթի ժամանակ նա նշել է, որ իրավունքների և ազատությունների արդյունավետ և արդար ապահովմամբ մեծ թվով ներգաղթյալների ընդունելու «լավ գործող համակարգի» ստեղծումը իրագործելի առաջադրանք է: «Եթե եվրոպական կառավարությունները կարողանան ազատվել հիստերիայից և խուճապից, կարողանան վերահսկել իրավիճակը, ապա, ես վստահ եմ, նրանք կկարողանան հասնել այդ նպատակին»,- ասել է ալ-Հուսեյնը:
Ըստ նրա՝ «Եվրոպայի երկրները պետք է միգրացիոն ճգնաժամին հետևողականորեն արձագանքելու միջոց գտնեն՝ հարգելով իրավունքները, այդ թվում՝ ԵՄ-Թուրքիա համաձայնագրի կոնտեքստում»:
ՄԱԿ-ի գերագույն հանձնակատարը հայտնել է, որ իրենց դիտորդները «Կենտրոնա-Միջերկրածովյան և Բալկանյան տարածաշրջանների առանցքային կետերում դարձել են Եվրոպայում ներգաղթյալների ձերբակալությունների թվի աճի վկա, այդ թվում նաև՝ «թեժ կետերում», որոնք ստեղծվել են Հունաստանում և Իտալիայում: «Փշոտ մետաղալարով ցանկապատված բանտախցերում և կենտրոններում հաճախ տեղավորվում են նույնիսկ երեխաներ, որոնք առանց մեծահասակների ուղեկցության են գնում,- ասել է նա:- Ձերբակալությունը երբեք չի համապատասխանում երեխայի շահերին: Նրա իրավունքները պետք է գերակա լինեն միգրացիոն խնդիրներից»:
Ալ-Հուսեյնը ԵՄ-ին «խստիվ կոչ է արել» բազմակողմանի տեղեկություններ հավաքել բոլոր անդամ-պետություններում ներգաղթյալների ձերբակալությունների մասին: «Այդ թվերը, վախենամ, մեզ ցնցեն»,- նշել է նա՝ «ափսոսանք հայտնելով ամբողջ եվրոպական մայրցամաքն ընդգրկող լայնորեն տարածված հակամիգրացիոն հռետորաբանության», ինչպես նաև «անջատողականության և քսենոֆոբիայի» մթնոլորտի կապակցությամբ:
