Հայտնի դերասան ու բլյուզ երաժիշտ Հյու Լորին հայտարարել է, որ ինքը հեռուստատեսության իր վաղեմի գործընկեր Սթիվեն Ֆրայի հետ հաճախ քննարկում է նոր նախագծում վերամիավորվելու պլանները՝ հաղորդում է BBC-ն:
Միաժամանակ Լորին նշել է, որ դա չի լինի այնպիսի սկետչ-շոու, ինչպես հայտնի «Ֆրայի ու Լորիի շոուն»:
Հյուն ու Ֆրայը ծանոթացել են Քեմբրիջում ու սկսել են ցուցադրել Ֆրայի ու Լորիի սկետչ-շոուն: Լորին պատմել է, որ ինքն ու Ֆրայն այդ տարիներին գրեթե չեն վիճել: «Դա բավական տարօրինակ է թվում»,- խոստովանել է նա:
Լորին նշել է, որ այլևս ոչինչ չի կարող պատմել, քանի որ իրենք դեռ «շատ առաջ չեն գնացել այդ գաղափարի իրականացման գործում», սակայն կցանկանային կյանքի կոչել այդ նախագիծը:
Դերասանը պատմել է, որ ուրախ կլիներ Մեծ Բրիտանիա՝ տուն վերադառնալ Հոլիվուդում 8 տարվա աշխատանքից հետո, որտեղ նկարահանվում էր «Դոկտոր Հաուս» հեռուստասերիալում:
