Ռուսական RIA Novosti լրատվական գործակալության փոխանցմամբ՝ Իրանն ու Ադրբեջանի Միջազգային բանկը պայմանավորվել են 500 միլիոն դոլարի վարկի տրամադրման հարցի շուրջ՝ Ռեշտ-Աստարա երկաթուղային հատվածը կառուցելու համար: Այս մասին այսօր հայտարարել է Իրանի քաղաքաշինության ու ճանապարհաշինության փոխնախարար Ալի Նուրզադը:
Նա հիշեցրել է, որ Ադրբեջանի էկոնոմիկայի նախարար Շահին Մուսթաֆաևը մայիսին այցելել է Իրան, որտեղ և ծանոթացել է Ղազվին-Ռեշտ-Աստարա երկաթուղու կառուցման ընթացքին:
«Ներկայումս մենք քննարկում ենք Ռեշտ-Աստարա հատվածի շուրջ համագործակցությունը: Ադրբեջանի Միջազգային բանկը այդ նախագծին կհատկացնի 500 միլիոն դոլար: Համապատասխան պայմանավորվածությունը ձեռք է բերված, քննարկվում են վարկի պայմաններն ու մյուս մանրամասները:
Նույն նախագծի շրջանակներում իրականացվող Ղազվին-Ռեշտ երկաթուղին պատրաստ է 93 տոկոսով, այն շահագործման կհանձնվի 2017 թվականի մարտին: Ծրագրված են երկաթուղային նախագծերն ավարտել 3-4 տարում, սակայն դա կախված է օտար ներդրումների ներգրավումից»,- ասել է նա:
