Վրաստանի նախագահ Միխեիլ Սաակաշվիլին կոչ է արել խստորեն պատժել կտտանքների և բռնությունների գործով բոլոր մեղավորներին: Այդ տեսարանները ֆիքսված են տեսագրություններում, որոնք հայտնաբերվել են Սամեգրելո տարածաշրջանի ստորգետնյա թաքստոցներում: Այս մասին հայտնում է Novosti Gruziya-ն:
Վրաստանի ՆԳՆ-ն հաստատում է, որ թաքստոցները ստեղծվել են նախկին իշխանությունների օրոք նախարարության բարձրաստիճան պաշտոնյաների կողմից: Դրանցում հայտնաբերվել են նաև մեծաքանակ զենք-զինամթերք և թմրանյութ, ինչպես նաև ընդդիմադիր գործիչների տվյալների արխիվ: Ծրագրվել էր այդ գործիչների ձերբակալությունը՝ հոկտեմբերի 1-ին կայացած խորհրդարանական ընտրություններում նախագահ Միխեիլ Սաակաշվիլիի «Միացյալ ազգային շարժում» կուսակցության հաղթանակի դեպքում:
Հայտնաբերվել էին նաև տեսագրություններ, որոնցում պատկերված են մարդկանց հանդեպ իրավապահ մարմինների ներկայացուցիչների կողմից իրականացված կտտանքների և սեռական բռնությունների կադրեր:
«Վերջին օրերին ներքին գործերի նախարարության տարածած տեսագրություններում, եթե դրանք իրական են, պատկերված է ծանր հանցագործություն: Այդ հանցագործությունն իրականացրած անձինք պետք է խստորեն պատժվեն: Այդ ամենը նողկալի է, և դա պետք է դատապարտվի ու հետաքննվի»,- ասել է Սաակաշվիլին հատուկ հայտարարության մեջ:
Սաակաշվիլին նոր կառավարությանը կոչ է արել պատժել մեղավորներին և չթաքցնել նրանց:
