Լատվիայի արտգործնախարար Էդգար Ռինկևիչը օրերս հայտարարել է, որ անհրաժեշտ է ԵՄ-ի հետ Ասոցացման նոր համաձայնագրի շուրջ բանակցություններ սկսել Հայաստանի ու Ադրբեջանի հետ: Երևանի մամուլի ակումբի նախագահ Բորիս Նավասարդյանը, անդրադառնալով Ռինկևիչի հայտարարությանը, «Առաջին լրատվական»- ի հետ զրույցում կարծիք հայտնեց, որ Լատվիայի արտգործնախարարը հայ-ադրբեջանական կոնֆլիկտում ուզում է կիրառել այն մոտեցումը, որ կար ԵՄ-ն ստեղծելիս: ԵՄ-ին անդամակցող երկրները, օրինակ, Ֆրանսիան և Գերմանիան հակամարտության մեջ էին, ԵՄ կազմում նրանք գտան համագործակցության եզրեր:
«Որքանո՞վ է այդ մոտեցումը կիրառելի մեր տարածաշրջանում. սկզբունքորեն հնարավոր է, բայց ժամանակավրեպ է այդպիսի խնդիր դնել պրակտիկ դաշտում: Որպես հեռանկար, որպես ապագայի տեսլական ընդունելի է, բայց պարզ է, որ այսօր զուգահեռ բանակցություններ Հայաստանի և Ադրբեջանի հետ ԵՄ-ն դժվար կկարողանա կազմակերպել, առավել ևս, որ երկու երկրները գտնվում են տարբեր վիճակներում՝ և՛ ժողովրդավարության, և՛ տնտեսական ազատությունների առումով»:
ԵՏՄ-ին Հայաստանի անդամակցության վերաբերյալ Բորիս Նավասարդյանը նշեց, որ դա ավելի շատ քաղաքական որոշում էր, որը որևէ կերպ իրեն չարդարացեց՝ անվտանգության խնդիրը որ դրվում էր, որևէ լուծում չստացավ:
Բ. Նավասարդյանի կարծիքով՝ եթե Հայաստանն ավելի ինքնուրույն քաղաքականություն վարեր, շատ ավելի լավ հարաբերություններ կունենար Ռուսաստանի հետ:
Նրա խոսքով՝ վերջին շրջանում մեր հասարակության բավականին մեծ շրջանակներում անվստահություն է առաջացել Ռուսաստանի նկատմամբ. «Բայց դա ինչպիսի ազդեցություն կունենա մեր պաշտոնական քաղաքականության վրա, դեռ վաղ է գնահատել, որովհետև առայժմ չենք տեսել կտրուկ որոշումներ և հստակ մոտեցումներ ինքնիշխանությունը պահպանելու առումով, որոնք պետք է լինեին»:
Մանրամասները՝ տեսայութում: