«Հայաստանում հողերի մոտ 25 տոկոսն անապատացման վտանգի տակ է»- այսօր հրավիրված մամուլի ասուլիսում ասաց Հայաստանում՝ ՄԱԿ-ի անապատացման դեմ պայքարի կոնվենցիայի ազգային համակարգող Աշոտ Վարդևանյանը և հավելեց, որ Արարատի և Արմավիրի մարզերի միասին վերցված 30 հազար հեկտարը երկրորդային աղակալված հողեր են, որոնք պիտանի չեն մշակման համար: Հենց այս երկու մարզերում է միայն նկատվում հողերի աղակալում:
ՄԱԿ-ի անապատացման դեմ պայքարի կոնվենցիայի համաձայն՝ հողերի անապատացումը հողերի դեգրադացիա է, որը պայմանավորված է տարբեր գործոններով՝ մարդկային և կլիմայական: Անապատացման հիմնական պատճառը ոչ ճիշտ գյուղատնտեսությունն է, անտառահատումները և գերարածեցումը:
Աշոտ Վարդևանյանը նշեց, որ անտառները ջրակարգավորիչ դեր ունեն, և դրանց ծավալները մեծացնելով՝ քայլ է արվում հողերն անապատացումից փրկելու ուղղությամբ:
«Երաշտը նույնպես հողերի անապատացման գործոններից է, ինչն անհամաչափ տեղումների հետևանք է, սակայն երաշտը կարելի է կանխատեսել և մեղմել դրա հնարավոր հետևանքները»,- ասաց Աշոտ Վարդևանյանը:
Մասնագետի պնդմամբ՝ երկրագնդի մակերևույթի 40 տոկոսը համարվում է չորային տարածք, որի 30 տոկոսն անապատացման վտանգի տակ է: Հայաստանը չորային տարածքում է, և անպատացված հողերի ընդհանուր ծավալը նորմայի սահմանում է:
Մինչ այս իրականացվել են հողերն անապատացումից փրկելու քայլեր, որի արդյունքում վերջին տարիներին 18 հազար հեկտարի վրա շուրջ 12 կմ ջրարփիացման համակարգեր են վերականգնվել, շուրջ 1300 հա-ի վրա դրենաժային հետևանքներն են վերացվել և 26 կմ ջրագիծ է վերականգնվել: Արդյունքում մշակման համար պիտանի հողերի ծավալներն ավելացել են:
