Այսօր խորհրդարանում գեներալ-պատգամավորներ Մանվել Գրիգորյանի և Սեյրան Սարոյանի հեղինակած՝ «Երկրապահ կամավորականների կարգավիճակի մասին» օրենքի նախագծի ընդունումից հետո գեներալները ցնծում էին: Իսկ երբ լրագրողները նկատեցին, որ օրինագծում ներառված չէ ազատամարտիկների հիմնական պահանջը` նրանց սոցիալական խնդիրների լուծումը, ՀՀԿ-ական գեներալ Սեյրան Սարոյանը լրագրողներին հայտարարեց. «Մենք բարոյական մասը պահենք, էդ փողի-մողի հարցերը, էնքան մարդ կա, ֆինանսի հարցը թող լուծեն էլի»: Լրագրողների դիտարկմանը, թե այսօր ազատամարտիկները հենց սոցիալական խնդիրներից են դժգոհում, գեներալ Սեյրանը հակադարձեց. «Այ քուր, որ տունդ հեր ու մեր իրար չեն ճանաչում, էրեխեն ու մեծն իրար չեն ճանաչում, ո՛չ մեծ կա, ո՛չ փոքր: Որ բարոյականություն չկա էդ տանը, ջայնմին միսն ու խորովածը, դու էլ: Ավելի լավ չի՞ հաց ու պանիր ուտեն: Քյասիբ ընտանիքներ կան, որ մտնում ես տունը, ընտանիքի հոտ ա գալիս, էնքան հարուստի ընտանիք կա, որ մտնում ես, զզվալդ ա գալիս: Բարոյական մարդը ի՞նչ կապ ունի հարստության հետ»:
«Առաջին լրատվական»-ի հարցին, թե Ձեր ընտանիքը հիմա ո՞ր ընտանիքներից է՝ հարո՞ւստ է, Սարոյանը պատասխանեց. «Չես իմանո՞ւմ, որ ասեմ քյասիբ եմ, կհավատա՞ս, իհարկե՝ հարուստ»:
