«Ժնև-2» համաժողովի հաջողությունը կախված է նրանից, թե արդյոք «Սիրիայում կդադարեցվե՞ն զենքի մատակարարումները և ահաբեկիչների փոխադրումը»: Այս մասին հայտարարել է Սիրիայի նախագահ Բաշար Ասադը Frankfurter algemaine caitung թերթին տված հարցազրույցում:
«Եթե Ժնևում հաջողվի դադարեցնել զենքի մաքսանենգությունը և Սիրիայի տարածք գրոհայինների ներթափանցումը, ապա դա, ինչպես մենք հույս ունենք, խաղաղ կարգավորման գործընթացի սկիզբը կլինի և կհանգեցնի լարվածության նվազեցմանը»: Ասադը նաև զգուշացրել է, որ «եթե Սիրիայի հակամարտությունը չդադարեցվի, ապա այն կտարածվի նաև հարևան երկրներ, և իրավիճակը կսրվի ամբողջ տարածաշրջանում»:
«Մենք կմեկնենք Ժնև և բանակցություններ կվարենք ԱՄՆ-ի, Ֆրանսիայի, Մեծ Բրիտանիայի և նրանց սպասավորների՝ Թուրքիայի, Քաթարի և Սաուդյան Արաբիայի հետ, քանի որ նրանք, ովքեր իրենց ընդդիմություն են անվանում արտասահմանում, դրա չինովնիկներն են»,- ասել է Ասադը: Նա հավելել է նաև, որ «ահաբեկչական խմբավորումներին նպաստող երկրները խոչընդոտներ են ստեղծում հակամարտության խաղաղ կարգավորման ճանապարհին»: Իսկ Դամասկոսում, նրա խոսքերով, կարծում են, որ «ժնևյան հանդիպումը կարող է երկխոսության սկիզբ ազդարարող կարևոր փուլ դառնալ»:
Նախագահի խոսքով՝ Սիրիան ճանաչում է այն ընդդիմությանը, որը «ձեռքին զենք չի վերցնում և կապված չէ ահաբեկչության հետ»:
