Սիրիայի ընդդիմությունը կհրաժարվի մասնակցել Ժնևի համաժողովին, եթե իր մարտական ստորաբաժանումները տեղանքում զիջեն կառավարական զորքերին: Ինչպես հաղորդում է ITAR-TASS-ը, France-2 ռադիոկայանի եթերում նման հայտարարությամբ հանդես է եկել Ֆրանսիայի ԱԳ նախարար Լորան Ֆաբիուսը:
Նա ընդգծել է, որ միջազգային հանրությունը պետք է կանգնեցնի սիրիական բանակին նախքան վերջինս ամբողջությամբ կվերահսկի Հալեպ քաղաքը և դրա շրջակայքը: «Պետք է կարողանալ կանգնեցնել այդ առաջխաղացումը նախքան կգա Հալեպի հերթը: Դա և «Հըզբոլլահ»-ի, և իրանցիների վերջին թիրախն է»,- նշել է նա և հավելել, որ կառավարական զորքերը քիմիական զենք են կիրառել:
Ֆաբիուսի խոսքերով՝ պետք է պահպանել ուժերի հավասարակշռություն, քանի որ վերջին շաբաթներին Սիրիայի նախագահի զորքերը և մասնավորապես «Հըզբոլլահ» լիբանանյան շարժման ստորաբաժանումներն ու իրանցիները ռուսական զենքի միջոցով վերահսկողություն են հաստատել շատ տարածքների վրա:
«Պետք է նրան (Սիրիայի նախագահ Բաշար Ալ-Ասադին.-1in.am) կանգնեցնել, հակառակ դեպքում եթե տեղանքում իրավիճակը հավասարակշռված չլինի, Ժնևում խաղաղության համաժողովը չի կայանա, քանի որ ընդդիմությունը կհրաժարվի մասնակցել դրան»,- ընդգծել է Ֆաբիուսը:
Նրա կարծիքով՝ եթե Սիրիայի ընդդիմությունը զենք ստանար արևմտյան դաշնակիցներից, «կկարողանար պաշտպանվել»: Ֆաբիուսը նշել է, որ պետք է հետևել եվրոպական պահանջներին, որոնք նախատեսում են զենք մատակարարել Սիրիա օգոստոսի 1-ից: «Տվյալ պահին մենք դեռևս վերջնական որոշում չենք կայացրել»,- հավելել է Ֆրանսիայի ԱԳ նախարարը:
Ֆաբիուսը նաև նշել է, որ ամերիկացիները մտադիր են ևս մեկ անգամ մտածել սիրիական հակամարտության դիրքորոշման շուրջ, քանի որ այն վերածվել է տարածաշրջանային և նույնիսկ միջազգային հակամարտության:
