ԱԺ «Բարգավաճ Հայաստան» խմբակցության պատգամավոր Գրիգորի Մարգարյանը անցած քառօրյային չքվեարկեց կառավարության ներկայացրած ծրագրին, մինչդեռ Տիգրան Ուրիխանյանը հայտարարել էր, որ դեմ են քվեարկելու: Գ. Մարգարյանից ու Դավիթ Քոչարյանից բացի ԲՀԿ մյուս պատգամավորները «դեմ» քվեարկեցին: Հաջորդ օրը ԲՀԿ-ամերձ մամուլը սկսեց քննադատել այս երկու պատգամավորներին՝ անգամ այդ նյութերը վերնագրվեցին այսպես՝ «Ցտեսություն, Բելաջիո», և տպավորություն ստեղծվեց, որ ԲՀԿ-ն դժգոհ է հատկապես Գ. Մարգարյանի դիրքորոշումից, ու միանգամից լուրեր տարածվեցին, որ նրան կհեռացնեն խմբակցությունից: Գ. Մարգարյանը «Առաջին լրատվական»-ի հետ զրույցում հերքեց, որ իր նկատմամբ դժգոհություն կա, և որ ինքը կարող է դուրս գալ կուսակցությունից: Այդ և մի քանի այլ հարցերի շուրջ է մեր զրույցը Գ. Մարգարյանի հետ:
– Պարոն Մարգարյան, ճի՞շտ են տեղեկությունները, որ կարող է դուրս գաք «Բարգավաճ Հայաստան» կուսակցությունից, և որ ԲՀԿ-ում Ձեր նկատմամբ դժգոհություն կա:
– Նախ` ձեր ինֆորմացիան հին և հոգնած է: Երկրորդը՝ ձեր տեղեկատվությունը չի համապատասխանում իրականությանը և լրիվ հերյուրանք է: Իսկ որ դուք ասում եք, թե «ասում են», գիտեք, հերյուրանք տարածող լրատվամիջոցներ կան, բավականին շատ են:
– Այդ տպավորությունը ստեղծվեց անցած քառօրյային, երբ Դուք ու ԲՀԿ մեկ այլ պատգամավոր Դավիթ Քոչարյանը չքվեարկեցիք կառավարության ծրագրին` այն դեպքում, երբ ԲՀԿ խմբակցությունը որոշել էր դեմ քվեարկել: Իսկ դրանից հետո ԲՀԿ-ի վերահսկողության տակ գտնվող մամուլը դրա համար սկսեց քննադատել Ձեզ:
– Չգիտեմ, թե ով է գտնվում ԲՀԿ-ի վերահսկողության տակ, բայց ձեր ասածը չի համապատասխանում իրականությանը: Երեք շաբաթն անցա՞վ, ինչ-որ բան փոխվե՞ց:
– Այսինքն` Դուք խնդիր չունե՞ք ոչ ԲՀԿ ղեկավար Գագիկ Ծառուկյանի, ոչ էլ մյուս ԲՀԿ-ականների հետ և շարունակելու եք մնա՞լ ԲՀԿ կազմում:
– Իհարկե, չունեմ: Բացարձակ որևէ մեկի հետ խնդիր չունեմ և շարունակելու եմ մնալ ԲՀԿ կազմում, ԲՀԿ խմբակցության անդամ:
– Իսկ ԲՀԿ դիրքորոշման մեջ փոփոխություն նկատե՞լ եք, որ վերջին շրջանում կառավարությանն ու վարչապետին մի փոքր ավելի մեղմ են քննադատում:
– Ճիշտն ասած, ես չեմ նկատել: Ես հետևում եմ բոլոր լրատվամիջոցներին և նմանատիպ բան չեմ նկատել: Կես ժամ է, ինչ նիստը սկսվել է, բացարձակ որևէ նման հայտարարություն կամ ելույթ չեմ լսել, եթե լսել եք շնորհավորում եմ ձեզ: Այ, որ ելույթները կլսեմ, նոր կորոշեմ իրենց մոտեցումը:
– Խոսքը այս նիստին չի վերաբերում: Անցած մի քանի շաբաթներին ԲՀԿ-ն շատ մեղմ կեցվածք էր ընդունել:
– Քննադատում է, հիմա դա սուր է, թե ինչպիսին է, բնորոշումներ չտամ, բայց քննադատում է: Այդպիսի ցայտուն տարբերություն չեմ զգացել: Մեր խմբակցությունում դեմոկրատ սկզբունքներ են, բոլորն արտահայտում են իրենց կարծիքը: Իհարկե, բնական է, որ որոշումը կայացվում է թիմային կարգով, և դա նորմալ եմ համարում: Բայց այնպես չէ, որ տոտալիտար ռեժիմ է, կամ ստալինյան ռեժիմ է, առավել ևս, որ այդ ռեժիմի թվերն անցել են դեռ 60 տարի առաջ:
– Բայց ասում են, որ ԲՀԿ-ում Գ. Ծառուկյանն է որոշումները կայացնում:
– Ո՞վ է ասում: Այդ ձեր սուտ, հերյուրանքների և բամբասանքների անունը կարծիք մի դրեք և մի հրամցրեք ժողովրդին: Հերյուրանքներ չե՞ն, որ ասում եք, թե հեսա ձեզ կհեռացնեն: Երեք շաբաթ է անցել, հեռացրեցի՞ն: Բոլորը ասում էին: Ասում էին, թե վերաբերմունքը փոխվելու է ձեր նկատմամբ:
– Բայց ԲՀԿ-ի ազդեցության տակ գտնվող կայքերն էին գրում «Ցտեսություն, Բելաջիո»: Եվ մեր կարծիքը այդ հրապարակումներից է առաջացել:
– Ես չգիտեմ, թե ում սայթում էր, ամեն դեպքում ժամանակը բոլոր հարցերի պատասխանը տալիս է:
– Ձեր ասած այդ նույն «հերյուրանքների» կամ կարծիքների համաձայն` ԲՀԿ-ում իշխանությունների նկատմամբ երկու դիրքորոշում կա՝ կոշտ և մեղմ:
– Որտե՞ղ եք տեսել, որ մոտ 40 հոգի մարդ ունեցող խմբակցությունում միանման, քսերոքս արած կարծիքները լինեն: Դա նորմա՞լ կլիներ:
– Ասում են, թե գործարար հատվածը հակված է ավելի մեղմ դիրքորոշում ունենալ իշխանությունների նկատմամբ, իսկ քաղաքական հատվածը՝ անհանդուրժողական:
– Գործարար հատված ասելով՝ ի՞նչ ի նկատի ունեք:
– Այն պատգամավորները, որոնք ունեն բիզնեսներ, սեփականություն:
– Բիզնեսն ու սեփականությունը տարբեր բաներ են, ինչ վերաբերում է սեփականություն ունեցող պատգամավորին, ոչ մի վատ բան չեմ տեսնում այդտեղ, սեփականություն դուք էլ կարող եք ունենալ…
